( عــــــــامر ) .!

[فهيد بن عصيدان]

السلام عليكم
العذر منكم على الغياب
أتيت بمرثيّه في اخي وإبن عمّي
عـامر بن ناصر آل عصـــيدان
" رحمه الله وغفرله ماتقدم من ذنبه "
المتوفي صباح الثلاثاء 2/12/2008

سبحان محيي الميّت ومفني الحيّ=في دبرته غيب الليال وقفاها
الآدمي مهما غوى ., تالي الغيّ=حفره ونازلها بيكشف غطاها
الوقت هاذاهو , والأيام هيّ هيّ=والأرض نفقد من سكَن في ثراها
أحّيـــــه من كبدٍ بمثناتها كيّ=كنّ الموسّم بالمثاني كواها
أركى عليها ميسمٍ لاهبه حيّ=عجزت أبرّدها وأحصّل دواها
من موت عامر منطوي خافقي طيّ=طيّ الحبال اللي ابعيدٍ مداها
ان جيت أبدْله .؟ قام فالبال يطريّ=والعي مع الورقا واغنّي غناها
وان جيت أبرثي .؟ ماذَخَر هاجسي شيّ=لكنّه أجزل من بيوتٍ ملاها
يافجعتي , وان قلت لش شهر .؟ ياويّ=تبطين والعين ايترادف بكاها
انتي معي , لش شهر واسبوع واشويّ=في قلبي , وعيني عناها عناها
يافجعتي لاشفت ديرانه إخليّ=ومجالسٍ من قبل موته زهاها
فقْده تَرَك للحزن في غيري وفيّ=مدارج سيولٍ تدربي حصاها
له فزعةٍ تِلحِق ضما الضامي الريّ=تغيث كبد ., وكبد يبطي ضماها
على إبن عمّه ظلّه أبرد من الفيّ=وأذرا من طْوالٍ يذرّي ذراها
يسرٍ مع العاقل وعسرٍ مع العيّ=وعوق القلوب السود لاجا بلاها
كنْ في صخا يمناه من حاتم الطيّ=اتحطّم ارقام العطا من عطاها
( ماقال هذا لك ولاقال ذا ليّ )=وعطيّته مايبتغي من وراها
لوّ الدموع إترجّع الحيّ للحيّ=ماشحّت العين الحزينه بماها
لكنّي ادعي له بقلبي وبيديّ=مافي يديّ الا الكفوف ودعاها
جعل السحاب اللّي مزابير وإمليّ=تمطر ويسقي جال قبره إملاها
اتعلّه الامزان هاذي ورا ذيّ=تسعين ليله تحتلب من سماها