!! .. طـوتنا الليالـي طيـة الكـف للقرطـاس .. !!

[صمــت اليتــاما]

السلام عليكم ورحمة الله وبركاته


,,

الا ياوجودي ليت قلبي بـدون احسـاس=على شان لاجـات المحسـات ماتكويـه
اقضّي حياتي داله مثـل بعـض النـاس=واريّح ضميـر يشكـي الهـم ويعانيـه
طوتنا الليالـي طيـة الكـف للقرطـاس=ورمتنا بسهـم لاجـرح خاطـر يدميـه
لبسنا لها بالصبر والحلـم درع وطـاس=لكن ماكتب للعبد فـي اللـوح مايخطيـه
ومهما شكينـا الهـم والا بكينـا البـاس=تراخى حبال العـزم والـراس مانرخيـه
نعيش وكرامة روسنـا مالهـا مسّـاس=ونمـوت وخفانـا للمخاليـق مانبـديـه
ولانرخـص الوافـي ولانغلـي البـلاس=ولانتبـع الجاهـل بممشـاه ونجـاريـه
ولاما انهزع وقت الشدايد ردي السـاس=رسينـا بعـزم قـوة الغـدر ماتثنـيـه
خذينا مع اهل الطيب واهل الوفا مرواس=ورجينا وحققنـا مـع الوقـت مانرجيـه
وعرفنا الذهب لو يحترق مايعود نحـاس=وعرفنا النحـاس الله لاعـاده وطاريـه
وبذرنا الجمايل في الرجاجيل والانجـاس=الانجاس تفشـل والكفـو دينـه يوفّيـه
وبعض العدا حتى عداوتك لـه نومـاس=لايجحـد ولايظلـم ولايثـلـم معـاديـه
لكن خصمة اللاش انتقاص وحرج وافلاس=لاينطحك ياخذ حـق صايـب ولايعطيـه
تعوذ منـه كمـا تعـوذ مـن الخنـاس=ولاعديت عدوانك على النـاس لا تطريـه
ولـم الروابـع كانهـا للرجـل مقيـاس=هي اللي تعلّـي منزلـه فـوق وتوطيـه
لاطابت تلبسه الفخـر والجميـل لبـاس=ولاما تردت... في مهاوي الردى ترديـه
وذي حكمة الله يوم حط العبـاد اجنـاس=احد يرخصه طبعه واحد شيمتـه تغليـه
ومن راقب افعال العرب صابه الوسـواس=ومن صد لايامن سهـوم القفـا ترميـه
ولاواهني من كان قلبه بـدون احسـاس=على شان لاجـات المحسـات ماتكويـه

الشاعر / عبدالله الشهـراني

,,


أختكم


,,