عشر نصايح للمسافر الى باريس

المبهم · #1 04-07-2008, 04:59 PM

--------------------------------------------------------------------------------

عشر نصائح للمسافر إلى باريس
النصيحة الأولى
أحجز تذاكرك من مكتب ولا تحجز عن طريق الانترنت. المكتب يرجع لك فلوسك ويغير لك الحجز بس عن طريق الانترنت فلوسك ما ترجع . بس لازم تحط في بالك بأن الحجز عن طريق الانترنت أرخص من المكاتب وفي عروض كثيرة من وقت إلى وقت.
النصيحة الثانية
استخدم الباص للتنقل من المطار إلى وسط باريس راح يكلفك 12 يورو رايح أو 18 يورو رايح جاي . والباص يوقف في محطتين في وسط باريس مقابل فندق كنكورد لا فييت. ومقابل قوس النصر.
النصيحة الثالثة
استخدم المترو في تنقلاتك داخل باريس وتجنب استخدام التاكسي . المترو يكلف باليوم 5.4 يورو ويوصل إلى كل مكان في باريس ومربوط بشبكة القطارات خارج باريس. خدمة الباص داخل باريس مش ولا بد تحتاج تنتظر أثر من 30 دقيقة عشان يجيك الباص. خل دام معاك خريطة للمترو وخريطة للباص.
النصيحة الرابعة
حاول أن تقوم بمشاهدة معالم باريس والتسوق خلال الفترة النهارية وقبل الساعة 7:30 . واترك التمشي في الشانزليزيه بعد الساعة 8 مساءا لأن كل المحلات في باريس تسكر قبل الساعة 8. (ونصيحة خاصة للنساء كفاية تسوق خلصتوا فلوسنا)
فاصل دعايات ........... سنعود لكم بعد الفاصل
النصيحة الخامسة
إذا كان رحلتك قصيرة أحجز لك فندق قريب جدا من الشانز ولو 3 نجوم ولا تتعب حالك . بس كل مابغيت الفندق فهو قريب منك. واذا أنت مطول فالنصيحة بفنادق الادفانس أو شقه وهذا أوفر لك وأكثر إستقلاليه.
النصيحة السادسة
أذا جيت تبي تشرب قهوة في الشانز لا تقعد تخز العالم إلى ماشين . خلك لحالك. وخل الناس لحالهم. عسى ما تمر وحده خليجيه إلا الكل قعد يطالعها (عـــــــــــــيب) الناس جايه تنبسط وتستانس وأنت جاي تنبسط وتستانس.
النصيحة السابعة
خطط يومك ورحلاتك وسأل كثر ما تقدر وتحب ، ترى الشعب الفرنسي طيب ويجاوب بكل سعة صدر ويتكلمون إنجليزي أحسن من الألمان . وإذا أنت ساكن في فندق خل الرسيبشن يعملك جدول للرحلات كل يوم بيوم. وحاول تخرج خارج باريس برحلة أو ثنتين.
النصيحة الثامنة
قبل لا تسافر بوقت كافي لا تنسى تتصفح المنتدى وتأخذ بنصايح الإخوة المسافرين العرب . ترى والله إنك بتوفر فلوس ووقت من نصايحهم (شكرا للأخوة الأعضاء في هذا المنتدى وشكر خاص للمشرفين عليه) . وكذلك لا تنسى تسأل أحد زملائك الذين سافرو من قبلك. وبرأيي لا تسأل مكتب السفريات لأنهم بياعين حكي كثير وأغلب نصائحهم غير مفيدة.
النصيحة التاسعة
حاول أن لا يكون يوم الأحد من ضمن رحلتك . لان كل شي يسكر يوم الأحد . إلا مقاهي الشانز. رتب تفسك على قضاء رحلة في منتزه أو خارج باريس أو خارج فرنسا.
النصيحة العاشرة
استمتع بوقتك بالتمشي والرحلات ولا يكون همك التسوق ترى بتخلص فلوسك وأنت ما شريت شي. لان سوقهم يجذبك. وإذا شريت شي بالفيزا فسلملي على اللمت . خل فلوسك حق الرحلات ولا تنسى الدزني لاند.
أنا قلت عشر نصايح بس هذي بونص مني لكم
النصيحة الحادي عشر
حول قبل السفر أن تقراء عن المواقع المهمة في باريس. وإذا وصلت باريس فقراء البروشورات المنتشرة في الفنادق ومحطات المترو. ترى جدا مفيدة وفيها عروض وأسعار مخفضة وخصومات
وهذا بونص عشان حبايبنا الأعضاء
النصيحة الثانية عشر
لا تنسى الكاميرا معاك وشرط أنها تكون دجتال . عشان تزودنا بصورك لما ترجع من الرحلة.

فلاح بن ملبز · #2 04-07-2008, 06:44 PM

ارحب يا عامر

النصيحة الثانية عشر
لا تنسى الكاميرا معاك وشرط أنها تكون دجتال . عشان تزودنا بصورك لما ترجع من الرحلة

أهم نصيحه

ويعطيك العافيه على ذا النصايح

وجزاك الله الف خير