ابشتري جي(ن) وبأركب بوالين .... واكتب على التنده ذبحني جفاها

[مناحي الصميل]

السلام عليكم ورحمة الله وبركاته



قصيده قديمه

وما اذكر هل انا نزلتها من قبل والا لا

الجـادل اللـي تنشـرى بالملاييـن=يالعنبـا حـبٍ جمعـنـي معـاهـا
قالت ابي ورده .. وجبت البساتين !!=وقالت .. هذي غايه وتمشي وراها !!
حنّا على ذا الحـال بحـدود عاميـن=الوصل والا البعد .. إختـر حداهـا !
يابنت انا شاريش وأبغي لش الزيـن=وشوفش طرب للعين وهـذا دواهـا
البارحه اغليش وبأغليـش ذالحيـن=والا العمـر فانـي ويبقـى غلاهـا
أبشتري جـيٍ وأركّـب ( بواليـن )=وأكتب على ( التنده ) ذبحني جفاهـا
أبركزه بالخط وأمشـي علـى إثنيـن=واليا ( قلبته ) قلـت عمـري فداهـا
هذي سوات الحـب سيـفٍ ابحدّيـن=أما بتآخذ ( خيرهـا ) او ( بلاهـا )
عندي على حبّـش ثلاثـة براهيـن=بأقولهـا بإذنـش وبأرحـل وراهـا
الأوله : دمعي تسابق علـى العيـن=وأصبحت قصّه كـل عاشـق رواهـا
والثانيه : تدرين انا عايشٍ ويـن ؟؟=في خيمـةٍ عايـش وفاتـح ذراهـا
والثالثه : تبطين .. وتبطين .. وتبطين=( ما تنكسر) نفسي ويقصر مداهـا !!




وسلامتكم