دونك بكيتي وهات الشاي والكبريت = بعدل مزاج ٍ تكـّدر حيل ياهادي
لاهنت ياصاحب ٍ غالي طويل الصيت = ياللي بكتفك عدلت الميل بااسنادي
واليوم جيتك من الضيقات ناصي البيت = بهمومي اللي سببها عايف ارقادي
وليتي طفا يالخوي لاهنت شبّ الليت = وبرد الشمالي رعد بااعظامي ارعادي
على لطيف الحشا ياصاحبي جنـّـيت = ماعاد فيني صحاوه عقب الابعادي
اقفا ولا عاد جاني والخفا بـّّذيت = مما حداني كشفت السر ياهادي
ياما عليه الرسايل بالحزن وديت = وقمت آتحرّا ردوده بس مافادي
والخط مغلق وانا ياكثر مادقيت = ومحاولات اتصالي دايم اتعادي
وقامت توارد هواجيس السهر مامسيت = واسجّ رجلي غبن والجوف وقـّادي
مدري وش اللي حصل له حي ولاّ ميت = ولاّ حدابه من اصدوف الزمن حادي
ياعزّتيلي من الافكار رحت وجيت = في كل الاحوال والحزات تزدادي
ياسرع الايام بالدورات والتشتيت = عقب المواصيل كل ٍ صار في وادي
واليوم عطني حلول ٍ يالخوي ملّيت = عجل علي بالحلل لاهنت ياهادي
وسلامتكم
الشاعر / سعود ارتيبان الجويّر
العرض الشجري