رساله من مواطن سعودي إلى منظمة التجاره العالميه
سعادة رئيس منظمة التجارة العالمية الدكتور / سوباجاي بانيجابكدي المحترم
بعد التحية ،،
كما يعلم سعادتكم بأن فصول مفاوضات المملكة العربية السعودية للإنضمام إلى منظمتكم قد قاربت على الإنتهاء .
والمملكة حالياً تسعى جاهدة لإنهاء بعض المشاورات مع بعض الدول لإتمام عملية الإنضمام بأسرع وقت ممكن .
وقد ذكرتم في إحدى مقابلاتكم بأن السعودية قوة اقتصادية مثيره للإعجاب في منطقة هامه جداً وأن الإقتصاد السعودي ومع ارتفاع اسعار النفط اظهر قوة ونشاطاً متميزين !!
ورداً على ماذكرتم " طال عمرك "( مصطلح دارج للإستجداء ستردده كثيراً بعد الإنضمام ) دعني اقول لك :
ماعندك سالفة !!
ولافي راسك انت واعضاء المنظمة .
شركات مفلسه .
نظام تجاري اسمه ( وسّع صدرك )
بطاله ( لاتقول لي ان الإنضمام سيحد من البطاله )
شفافيه مافيه!! عندنا شي اسمه تظليلة كتم .
هاه يكفي ولا ازيدك ؟
إلا خلني ازيدك عشان ماتعودها :
شف يابوالشباب :
وش اهم الدلالات على قوة إقتصاد البلد ؟
اكيد التنوع في مصادر الدخل .
انا من الحين اعطيك اياها كاااش :
ماعندنا الا ذا البترول ويمكن شوي غاز بعد كم سنه حسب المفاوضات الجاريه مع أهل الحوطه .
صناعة مش خشتك إلا من بعض المصانع التي أثرت السوق المحليه بالمنتجات البلاستيكيه من شبوك وطشوت وبطانيات البوليستر !! وبعض الصناعات الدوائيه المتمثله بعلاج للصداع وسنافي .
زراعه ابشر بسعدك عندنا اكبر مزارع في العالم ( هم يقولون ) لإنتاج القمح والتمور والألبان لكن تفتقد لأهم عنصر في الزراعه الا وهو " المياه " وقد توقفت زراعة القمح منذ مايقارب 10 سنوات لهذا السبب . والدوله حفظها الله لم تألوا جهداً في توفير المياه عن طريق إيصال مياه البحر المحلاة ( لكن لو جيت للسعوديه ووقفت المويه عليك لاتبلشنا ).
ولاتنسى تذكرني اذا جيت زياره للسعودية اوريك بعض منتجاتنا الزراعيه .
المهم .
الإستثمار المحلي :
اووووووووه وش اقول لك وش اخلي
هذا ياطويل العمر ( رددها معي عشان تاكل عيش ) نوعين من الإستثمار المحلي مالهم ثالث :
عقار وأسهم ( وفيه انواع اخرى مثل بيع جح وتمركنز قبل سنتين وشروخ لكن فرديه وعلى خفيف ) لذلك خلنا في المهمه :
العقار:
مستلمينه عوائل كل حسب ماترك له والده !!
والأسعار بتشوفها لين جت شركاتك تدور مقرات لها وبيفرغون لهم وهم يصيحون .
أسهم :
وهذا اللي مخليني ارسل لك هالخطاب !! ( اجل متعلق بصدق ب 160 !! )
اسهمنا في يدين ناس ماترحم .
بنوك تساعد على سرقة مدخرات الشعب .
بنك مركزي لايستطيع إتخاذ قرار واحد لإيقاف التلاعبات الفاضحه في سوق المال
وزارة ماليه اشبه بمكتب محاسبي
وزراة تجارة تساعد الشركات المساهمة في إعطاء قوائم ماليه غير صحيحه
وانتبه لايلعبون عليك ويقولون افتتحنا سوق المال وتعالوا ترى بيعلقونك مع اصبع رجلك الكبير .
ولك ان تتصور أنهيار يومي في سوق الأسهم لمدة 10 ايام متواصله بمعدل 5% يومياً في بلد ذكرت بأن اقتصاده قوي .
ماقلت لك ان ماعندك احد انت ومنظمتك .
ختاماً :
نصيحتي لك ان تحافظ على مدخرات الشعوب الفقيره في امريكا الجنوبيه واوربا وامريكا وأن لاتتوهق وتقدم على خطوه تجي بعدها تصيح ترانا في ديرة " منيب خالةٍ لأحد "
اما نحن فقد اخذت الدوله حفظها الله احتياطاتها الكامله وقامت بوضع صندوق معالجة الفقر استعداداً لأي طارئ !!
المرسل : مواطن سعودي .
26-06-2005, 11:07 AM
العرض العادي
