القصيدة التي أعجبت ألأمير سلطان ووقف لها خالد الفيصل

[الخريف]

السلام عليكم ورحمة الله وبركاته

احببت أن انقل اليكم قصيده وجدتها في احد المنتديات لفتت انتباهي وقد قرأتها اكثر من مره لروعتها وجمالها وقوة تسيير الشاعر لمعانيها اترككم مع القصيده واتمنى ان تنال استحسانكم ,,

قصيدة الشاعـر المـلازم / مشعـل الحارثـي
والتي ألقاهـا أمـام صاحـب السمـو الملكـي
الأمير سلطان بن عبد العزيز في ميدان مجموعة
لواء الملك خالد الرابع في المنطقة الجنوبية 00
وبعدها تم نقله إلى مكتب سمو الأمير الخاص ..

خل النياح وفـارق العـش ياطيـر=غرد وهز الريش فـي كـل عالـي

اليـوم هـذا غيـر وأيامنـا غيـر=والبارحـة ماهـي سـوات الليالـي

الأرض صارت في عيوني نواويـر=والبـدر تـم وجـا مكـان الهلالـي

وأبها تحدت فـي بهاهـا الغناديـر=فلـت جدايلهـا وقـامـت تـلالـي

وفي وجه خالد للفرح الـف تعبيـر=وحجاج فيصل فيـه كـل أبتهالـي

من السعـاده باقـي شـوي ونطيـر=عزالله أن اللـي لفـا الـدار غالـي

يامرحبـا مـاغـردن العصافـيـر=مرحبـا مـازاف نبـت الرمـالـي

ترحيبٍ أحلى من حليب المصاغيـر=وضحٍ رعت روضٍ ربيـعٍ وخالـي

ياللي شكت رجله طـوال المشاويـر=ياطـا بهـا درب الخطـر مايبالـي

قرت عيـون اللـي يحبـون ياميـر=طاريك.. وإلا الحيـن شفتـه قبالـي

ياما حسبت الوقت حسـب الدنانيـر=أسامـر نجـوم الثـريـا لحـالـي

مبطي وانا أسمع فيك وصف البياطير=واليوم جالي فـي القصيـدة مجالـي

ياسيـدي مـال القوافـي معـاذيـر=عـن البيـوت الوافيـات الجزالـي

من لاجعـل للمـدح قيمـة وتقديـر=ماظنتـي يلفـت ذهـون الرجالـي

وأنت الذي معك سحـاب المزابيـر=تمشـي ويتبعـك الحيـا والخيالـي

وأنت الذي بأسمك تبـاح الأساريـر=مثلك له أسمـاء عـراضٍ طوالـي

سلطان ياسلطان من يومـك صغيـر=مافي تسلطانـك وشخصـك جدالـي

كانوا ولا زالـوا يسمونـك الخيـر=وياكثر السماء اللـي تزاحـم فبالـي

كريم سبـلا إلا زبـون المخاسيـر=طلـق الحجـاج إلا بعيـد المدالـي

درع البـلاد إلا طويـل الأشابيـر=أبـو اليتيـم إلا عشيـق المعـالـي

لاوالله لبن مسطـر المجـد تسطيـر=على حصى الأرض ونفود الرمالـي

واخو فهـد ذروة سنـام المشاهيـر=صفوة ملوك الأرض بـأول وتالـي

فهد ولا قلنـا فهـد جـاوب النيـر=تهتـز لإسمـه راسيـات الجبالـي

زعيمنا اللي للعـلا واصـل السيـر=حتـى تعلينـا علـى كـل عـالـي

مال الطموح بوسط رأسـه معاييـر=ولا للعوج عنـده ياكـود اعتدالـي

اليا زعل تزعـل ملـوك وجماهيـر=واليا رضا ينهـي جميـع الجدالـي

مايشبـه غيـر الثنيـن المناعـيـر=أنته وأبـو متعـب كريـم السبالـي

عبد الله اللي فيه مـن سالـم الزيـر=خطل اليميـن الليـث حـام التوالـي

سقم العدو اليـا هـرج دون تفكيـر=رده على العـدوان جاهـز وحالـي

نفخـر بكـم وإلا القصايـد تعابيـر=ياشيوخ نجد الشعـب كلـه موالـي

والله لوفيكـم عـن الملـك تقصيـر=ماخصكـم ربـي عزيـز الجلالـي

منـا وفينـا مالفيـتـوا مـداويـر=حكامنـا وقـت الدهـور الهزالـي

ورث الجدود أمن الليـال المعاسير=قبل القصور وقبل صرف الريالـي
هاك الزمان سلاحنـا حملـة بعيـر=مـن يومهـا متوثقيـن الحبـالـي

منهاجنـا واضـح ولا فيـه تغييـر=نمـوت مانرضـى عليـه البدالـي

مااستعمرونا اللي غذاهـم خنازيـر=تشهد لنـا شهـب السنيـن الخوالـي

من قبل عاشر جد أبو بـوش وبليـر=ماهي ثـلاث شهـور وإلا حوالـي

واليوم في وقت الرخـاء والتياسيـر=شفنـا العجـب لاوالله إلا الهبـالـي

ياكثـر ماقامـت تسـوق المقاديـر=وياشيب عينـي لاذكـرت وطرالـي

المسجد اللي هزه أصـوات تفجيـر=فـي حـزةٍ فيهـا يجـاب السوألـي

والمسلم اللي ذبح مـن دون تبريـر=ودم الرضيع اللي على الوجه سالـي

ينشدك يامكفر هـل الديـن تكفيـر=وش حكم ذبح المسلميـن العزالـي ؟

تدبـر القـرآن والـهـدي تدبـيـر=وأخذ الجـواب بصيغتـه والكمالـي

فضحكـم الله يالوجيـه المغابـيـر=ياطغمـة التخريـب والإنحـلالـي

واللي على الفتنـة تـدق المزاميـر=نعرف مطامعهم علـى كـل حالـي

ونعرف من يدفـع رسـوم الفواتيـر=يالحيـة اللـي جحرهـا الإحتلالـي

لنحورهـم حنـا سـوات الأزاريـر=حنا حمـاة الديـن ياهـل الظلالـي

الأرض نزرعها رمـاح ومساميـر=يحـرم عليهـم وطيهـا بالنعـالـي

ديارنـا ماهـي بكابـل وكشمـيـر=ياهمـلالـي صــدق ياهمـلالـي

حامينها الأجـداد عـج ومعاصيـر=بسيوفهـم علـى ظهـور الجمالـي

واليـوم ياسلطـان شفهـم طوابيـر=ملوا من المجـلاس تحـت الظلالـي

يبـون يـومٍ فيـه للحـق تكبـيـر=عـن الكـلام تبـان فيـه الفعالـي

ياسيدي قل وش تبي بـس ويصيـر=حدد هدف لوهـو عسيـر المنالـي

فالجـو نفاثـة وفالقـاع جنـزيـر=وأن مت هاك اليوم من طيـب فالـي

هـذا وطنـا ماسكـنـاه تهجـيـر=الجيـش واحـد ماجمعنـا الحثالـي

لو ينتخي عرعـر تلبيـه خرخيـر=كل الجنوب يصير جنـب الشمالـي

لا ياوطـن لاتحسبـنـا مدابـيـر=لو الدهر في بعض الأحيـان مالـي

طالبك لاتجفل مـن الوقـت وتذيـر=وكلنـا أبـنـاك وبالله الأتكـالـي

وأن كان ماشفت السعـد والتباشيـر=عيـبٍ عليـنـا لبسـنـا للبـدالـي

نذرٍ علىّ لاحرسك وأفديـك وأغيـر=ديني وعرضي فيك وأغلـى حلالـي

واللـي يأثـر فيـك بأيـات تأثيـر=أبرى منه لو كـان عمـي وخالـي

وأن مت واخذتني صروف المقاديـر=والله لاوصـي فيـك حتـى عيالـي





اتمنى انها تعجبكم