السلام عليكم ورحمة الله وبركاته
هذا أول موضوع أطرحه بحكم إني جديده
وحبيت ان أول موضوع يكون عن شاعري المفضل
حبيت أشارككم متعتي بقصائده
الشاعر محمد بن حمد بن فطيس المري
متعه وإبداع ما بعده إبداع
أنا عارفه إن بعضكم ما يحب يقرا
بس بيفوووووته ( شعر ) بمعنى كلمة ( شعر)
أنا كتبت لكم بس 6 قصائد طبعاً عندي أكثر
حدود 15 قصيده
بس حبيت أعرف ردودكم
وإذا تبغون المزيد أنا حاضره
أترككم مع القصائد
1/ الــــبـــارحـــه
(( يوصف شعوره لما مر مكان نقابل هو وحبيبته فيه<< ركزو في وصفه لنزول الدمعه ووصفه الدقيق لمكان العبره ))
الـــبــارحــه ربــي كـتـب لــي ومـرّيــت 00 دربٍ عـلـيـه بـروق الأحـبـاب لاحـت
جـيـت الـمـكـان اللي جـمـعـنـا وخـفـيـت 00 وقـامـت جـروحـي للجوارح وصـاحت
يـــالـيـتـنـي في لــفــة الــــدرب زلــيــت 00 كـان العـيـون امن الـدموع استراحـت
إلـتـم غـيـم الــدمـع من يــوم لـــفـــيـــت 00 وورْق القـصـيـد لـشـوفـة الغيم ناحـت
وضحكت ماابغى الناس تدري يا ابا الفيت 00 لـكـنـهـا غـصـبٍ عن الـعـيـن سـاحـت
حــارت دمـوعـي فـي عـيونـي وصـديــت 00 وأرمـشـت ابـيـهـا ما تبين "وطاحـت"
وعـقـبـه بـرق فـالـعـيـن بـرّاق وأسـقـيـت 00 خـدّي وونــــاتـي بـصـدري تـلاحـت
وأنا أحسب إني في فراقه تعافيت 00 وإن عبرتي من مدخل الزاد زاحت
اللي يحسب إني عن البعد سجيت 00 ولا إن عيوني للرقاد استباحت
يا ليتني من قبل لاأحبه أقفيت 00 ولا إن دروبي عن دروبه تناحت
أهون علي امن البكا والتناهيت 00 وأسلى من سدوٍ على الناس باحت
عرفت كيف الحي يقرق عن الميت 00 وعرفت قيمة نعمتي يوم راحت
قولو له إني عقب بعده تدانيت 00 ورجلي عن دروب المعافين شاحت
البعد نار وطاعة العذل كبريت 00يقصر على بعده ترى الكبد فاحت
2/ الــــصــــــقــــــاقــــــيـ ــــر
(( يتكلم عن المقناص والصقاقير<< وصفه فيها خطييييييير للمقناص من طعو عالخط لين قنصو ووصف دقيق للطير تحس إنك من جد معاهم ))
الله على الربطه يعين الصقاقير 00 اللي تعد الريش وتعد الأيام
يقطعون أوقاتهم بالتسايير 00 وشوف المقانيص القديمه بالأفلام
تشوف راعي الطير عاف المظاهير 00 ومن شوفة القمرا وعدٍ لها صام
قعد ما بين أهل البنا والنجاجير 00 وفي دورته ما أهتم في فرق الأقيام
يبغي مقيظه ما يجي فيه تقصير 00 من خوف لوم اللي إلا شافها لام
ويجيب لطيوره حليب العصافير 00 إلا تباطى حذفهن ريشة العام
يغيب صبح وظهر والعصر وعصير 00 ويظهر عشاها عقب ما جا من الزام
يقسم علفها بالتساوي بتقدير 00 وقدامها كني به يكسر عظام
كنها تزيده لا تعشت دنانير 00 وإلا أدرجت ما يفتكر في هل الشّام
تمسي وهو ما امسى روابع وتفكير 00 يرمي به الهاجس على جال الأحلام
ويذكر مكانٍ داجه العام بالخير 00 ويطري عليه أزين مقانيصه أعوام
وذيك الوناسه والقنص والمشاوير 00 وخوة رجالٍ هل مقانيص وحشام
الله جمعهم كلهم في سيايير 00 وقدامها فرقهم ظروف وأحكام
على الوعد فأول محطه طوابير 00 وفي كل موتر عزبةٍ فوق قسّام
افلان ينطر له رفيقٍ على السير 00وفلان خذ للربع من كل الأنعام
وفلان عند البنشري يركب سبير 00 وفلان قدامه يركب له أسيام
وفلان عجل ولا يبي زود تأخير 00 شغل وراح وواعد الربع قدّام
في شفّهم ما حسبوا للمخاسير 00 لو زادت أصفارٍ مياسيرها أرقام
في حلها بالطيب ما هو بتبذير 00 يراقبون الله وأحكام الإسلام
وراعي القنص عمّن يسب القنص غير 00 شف ذا إلا ذهن وشف ذا إلا نام
يغط غط الذيب وإن ذهن يطير 00 ويقوم عاد اللي معه ما بعد قام
ويشب فاللي قبل يحتاج تكسير 00 في ليلةٍ ما فاد فيها التلطّام
وفيما هي تفوح الدلال المباهير 00 خذ ركعتينٍ بالخفا لله قيام
وإلا قضا ركز دلاله مساطير 00 وأذن ولا يحتاج للربع قوام
تمالو وركبو وراحو مداوير 00 للي يروع زولها كل ضرغام
برق الجناح اللي إلا قامت تسير 00 أول ما يطري للربوع التشيّام
نشاورو وأصغو لخيرالأشاوير 00 وهدو غرام الشارده عقب لزّام
هدو معيدٍ عوقها عقب تذيير 00 أصله وحش مطروح في ديرة ألغام
مغتر ولا بطبعه بطبع المغاتير 00 من يوم رب ووالف الدّس ما حام
مطلق عمد ، صافي ، وسيع المناخير 00 كن دقّ صدره دقة شماغ بسّام
عود ويخال بها هل الفرخ والجير 00 جسر وعلى المدخال في الجول عزّام
أعطاهم الصيده بعد ماخذ السير 00 وعلم فروخٍ كان تحتاج علام
هدو وصادو والهدف هدة الطير 00 ما همهم لدهام ولا لعزّام
تبدلو فالزرع شوف النواوير00 وتبدلو فالزحمه فياض وخيام
على لحم صيد وحليب المصاغير 00 تبدلو بالسير بالقيد درهام
وسجو من هموم البلد والفواتير 00 وهموم الأسهم ذاك عارض وذا سام
وتريحو من قولتٍ صار تفجير 00 ومن شوفة الفتنه ومن كذب الإعلام
انشوف تفجيرات ونشوف تعزير 00 ولا جهلنا ما حصل بعد صدّام
لاكن شوف وحر جوف ومقادير 00 ويش الجهد غير الدعا والتهشام
الزبده إن البر من غيرها خير 00 لا صار مع ربعٍ صقاقير وحشام
وبعض الرجال اللي يلوم الصقاقير 00 ماهو يعد الريش ويعد الأيام
تراه مربوطٍ مثل ربطة الطير 00 ويقصر جريره حده البيت والزّام
3/ الـــلّــه يـــجــازي
(( يعاتب حبيبته << بجد عزة نفس يا لبييييييييييييه
الله يجازي من يسوي سواتك 00 وبذنوب من سوا سواتك يجازيك
مشيت درب الثقل وتحب ذاتك 00 ما تدري إنه للمهالك يوديك
وغرّك جمالك يا خسارة حلاتك 00 ما تدري إن ماغير طبعك يحلّيك
بتقول زينك يشفع لسيئاتك 00 الحسن ما هو عن وفا الحب يعفيك
لو التواضع والوفا من سماتك 00 بعت الحبايب كلهم دين وأشريك
لكن عجزت أغيرك يا جراتك 00 على الغياب اللي بلا عذر ينجيك
خطاي في توضيح وشهي غلاتك 00 وخطاك في توضيح وشهو تغليك
وشلون توصيني وتنسى وصاتك 00 وتصد عن صوتٍ تقطع يناديك
ما فاتك التجريح والعذر فاتك 00 وتبغي رضاي إلحين ما عاد يمديك
صحيح أحبك بس هذي جزاتك 00 بعلمك درسٍ يفيدك ويحييك
تدري وش أبيض من خفوقك؟ "عباتك" 00 وتدري وش اللي غرني؟ "نظرتي فيك"
أدري بتستغرب تصبر وجاتك 00 قصيدةٍ من واحدٍ "كان" يبغيك
وتبغي تناظر وأنت عايش مماتك 00 شف وحدتك والناس تجلس حواليك
وتبغي تشوف اشجع رجل في حياتك 00 شفني وأنا راحل على كثر ما أغليك
4/ ودي بــك
(( يغير في لكنته عشان يرضيها << لا حظوا المكالمات فجواله ))
ودي بك وأبيك وأباك وأبغاك 00 جمعتها لرضاك وإختار فيها
شف ويش منها يتبع رضاك وحكاك 00 واللي لك أسقي مسمعك لا ضميها
غديت أفرّ احكاي وآساير حكاك 00 وأنا أتشرف لكنتي وأهتويها
مضمونها ودي بشوفتك وأهواك 00 ياللي دروب أهل الردا ما تجيها
صانك ولي أمرك وحبك وداراك 00 ولا قدر رعد الحظوظ ومجيها
نفسك مهذبها وعز الله رباك 00 ما يدري إن جيش الهيام يغزيها
يامرك قلبك بالوفا لي وتنهاك 00 ناسٍ على لاماك تفرك يديها
رزين عقل ومن مزايا مزاياك 00نفسك تحب وعفتك تمتطيها
ياعزوة أخوانك ومطلب هذولاك 00 ناسٍ محبة والدك تدعيها
ناسٍ تخدم آبيك كُلّه لعيناك 00 وهو يحسب إن الله عليه يهديها
يا جعلها تفدا على الأرض ما طاك 00 والله ومنهو مثلها يبتليها
لكن لعب في يا وليفي تغلاك 00 ونفسي غلاك امن الصدود يحديها
تبطي علي وأنا هنا وآتحراك 00 وكبدي لواهيب الصبر تشتويها
كانك مشكك فالغلا والوفا هاك 00 جوالي اقرا القائمه كل ابيها
اسمك مع الصادر ولا وارد سواك 00 وفالناس اللي لم يرد عليها
وإياك وإياني وإياني إياك 00 من غيبةٍ من دون عذر يحميها
5/ طــيــري غــدى
((يتحسر على طيره اللي غدى << تحس كنه فاقد ولد مو طير من حبه له ))
يالله ياخالق سما وأرض وأبراج 00 ياكاتبٍ للعبد موته ومحياه
يا من جميع الناس لرضاه تحتاج 00 حاجة مريضٍ ينظر الموت لدواه
يرضيه شوف العابد الحافي الحاج 00 ولا يجيب رضاه مالٍ ولا جاه
ويرضيه صوت مهمهمٍ فوقه سراج 00 عبدٍ إلا جا تالي الليل ناجاه
يقدر يمد الخلق لو جوه أفواج 00 يعطي ويمنع يعني الرزق برضاه
العمر مثل اليم وأيامه أمواج 00 والموت مثل السيف ما جاه زكاه
عبدك وأدور من سجن همي افراج 00 إلطف بعبدٍ لا لحقه همٍ أقصاه
وإلطف بعدٍ لفه الوقت بسياج 00 لا هو بكاسرها ولا هي بمرخاه
وإلطف بقلبٍ بالتنهاد لجاج 00 على الّذي ما تبت من زود لقياه
وإلطف بعينٍ دمعها دوم زعاج 00 لون امحجرها مجهمٍ عقب فرقاه
لا فاقدٍ منصب ولاا فاقدٍ تاج 00 لكن فقدت أغلى من الشوف لا تاه
طيري غدى يزيد عاود لا راج 00 أدعيه بفوادي ولا رد لدعاه
متّ برجاه ولا التفت لي ولا انعاج 00 لا أقنعت من وصله لا ظني ألقاه
ياللي تقول تعيضني فيه بأزواج 00 الله يعيض العين في زيد لاماهاترك فوادي
اترك فوادي ينفد دعاه بخلاج 00 واعتق سبيله كان لك قلب لله
خلّه يبرد حرته بالتنشاج 00 مادام حيلتك الحكي والمواساه
عليه دام الليل للصبح ينباج 00 وأنا فوادي يشكي أقصاه لأدناه
عقبه وأنا بين المخاليق دواج 00 صيدي ونين وهم والقلب ما أخلاه
إليا طرت لي ضيعته وسط الإزعاج 00 سج الفواد إذني بونته وبكاه
ما عاد به طربه ولا فلة حجاج 00 الطير قفى والعوض فيه طرياه
6/ مـؤمـن الــرّيـفـي
(( يشكي لدكتور العيونويوصف معاناته << السر اللي استأمن الدكتور عليه ما يخطر على بال أحد ))
يا مؤمن الريفي أنا جيتك زبون 00 جيتك على مدح أكثر الناس وأعنيت
جيت وتعالى الله عمّا يشركون 00 لولاه يا مؤمن لطبّك ما اهتديت
راضي بحكم الله علي مهما يكون 00 عالج عيوني لو بعد طبك عميت
ودّي أخاشر فالبصر من يبصرون 00 وأشوف دربي لا سرحت ولا وضيت
وإلا قنصت أثبت مع اللي يثبتون 00 وآشوف طيري كل ما أضميت ودعيت
ياكثر ما يضرب خويي الطابلون 00 من كثر ما أكلته مطبات وكليت
وودي أشوف اللي عليّ يعرضون 00 وبعض الّليالي ودي أسري دون ليت
وأشوف ناسٍ بالقفا ما يرحمون 00 إما وقفت لصاحبي ولا مشيت
من دون نظاره ولا هم يحزنون 00 يا كثر ما كسرت كشمات وشريت
لكنّ يا دكتور جعلك ماتهون 00 أبيك كلمة راس دامك ما بديت
اسمع ولا ابغى اللي وزانك يسمعون 00ربي كتب يكشف لك أسراري وجيت
صورة وعديل الروح عندك فالعيون 00 وأخاف تقطعها بموسك ماوعيت
ولا عليك أمرأطوها تحت الجفون 00 وعقبه لو تقطع عيوني ما شكيت
هي راس مالي والعرب ما يدركون 00 إني على باب الممات ما حكيت
يا قوّ قلبي يوم قفن الضعون 00 اللي على ذاك الموادع ما بكيت
ويا صبر صبري والعواذل يحسبون 00 إني دلهت امن الهوى ولا سليت
أسكت عساهم من سكاتي يسكتون 00 وأنا عن اللي في ضميري ما انتهيت
وأدور الفرحه مع اللي يسهرون 00 وإن ذكروني خذت فنجان وسريت
أخذت من وقتك يا دكتور العيون 00 عالج عيوني لو بعد طبّك عميت
وأستر علي واللي معك لا يفطنون 00 إنت الوحيد الي بعد ربي دريت
من جد تعبت عليها
بس والله متعه
كل ما اسمع القصيده مره ثانيه
اكتشف اشياء ماكنت منتبهه لها
الله يعطيني العافيه
23-10-2011, 11:11 AM
العرض العادي
