احدٍ تحركه المشاعر ويهتز=واحدٍ سواليف الخطا ما تهزه
بعض العرب ياشيخ ما يقبل الكز=شيخٍ ولا شيوخ القبايل تكزه
والبعض عايش في حياته مدزز=من وين ما ودك تدزه تدزه
ان قلت له ياطيب فالي مع الوز=قال اعتبرني يابن الاجواد وزه
وان قلت له عنز عن الجود عنّز=ويصافحك لو تبتدي في مكزه
هذاك لو تسلب معاليه ما اهتز=ما تستفزه لو تبي تستفزه
ولا فانا ياشيخ عايش معزز=لي هيبةٍ من فضل ربي وعزه
قلبي واعرفه لا توحا الخطا فز=لحيث له مع عزة النفس فزه
لو كان نفسي تشتهي لقمة الرز=ما سقتها للشيخ من شان رزه
اعز نفسي وابتعد واتعزز=لا صارت الدعوى تطول المعزه
اما حياةٍ كلبوها على عز=ولا فلا لي عند الاجواد رزه
احدٍ بدون مجامل الناس مرتز=واحدٍ ولو تجامله ما ترزه
العرض الشجري