كل زين اشاهده وانتم بعيد ... رحلتي الاوربيه ( ايطاليا - سويسرا - فرنسا )

[نـاصـر]

مبدع مبدع ابو حمود

انا بخوي عليك الصيف الجاي

[مناحي الصميل]

يا سلام يا سلام

ولا تعبت


بدايه رائعه وتصوير اروع

بإنتظارك حتى اخر صوره

[المحامي vip]

الصور بغاية الروعــه

مشكور يابو محمد

[سعد الصميل]

المشاركة الأصلية كتبت بواسطة ابو راس

يجعلك تعوده كل سنا

يا مرحبا بك اخوي ابو راس

والله يعطيك العافيه .

[سعد الصميل]

المشاركة الأصلية كتبت بواسطة ابن عاجب

السلام عليكم ورحمة الله وبركاته

مبدع مبدع مبدع واستاذ في الابداع

الصور الي عجبتني وتم الاحتفاظ فيها من بعض اذنك









وفي انتظار

فينسيا

اخيك

ابن عاجب

عليكم السلام والرحمه

يا مرحبا يابن عاجب .. ومرورك هنا الابداع ..

لا هنت .

[سعد الصميل]

المشاركة الأصلية كتبت بواسطة najla

الحمدالله ع السلامه اخوي سعد

و باين من الصور ان السفره كانت حماااس

متابعينك بلاااا شك

بس لا تبطي علينا

الله يسلمش اختي نجلا ...

حياش الله وخليش متابعه .. الباقي واجد ..

[سعد الصميل]

المشاركة الأصلية كتبت بواسطة نـاصـر

مبدع مبدع ابو حمود

انا بخوي عليك الصيف الجاي

ارحب ياخال

حياك الله طال عمرك ... وخوتك تنشرى يابو عامر

لا هنت .

[سعد الصميل]

المشاركة الأصلية كتبت بواسطة مناحي الصميل

يا سلام يا سلام

ولا تعبت


بدايه رائعه وتصوير اروع

بإنتظارك حتى اخر صوره

ارحب يا شاعرنا ..

ولا ندمت طال عمرك ...

والقادم قريب طال عمرك .. خلك متابع ..

[سعد الصميل]

المشاركة الأصلية كتبت بواسطة المحامي vip

الصور بغاية الروعــه

مشكور يابو محمد

يا مرحبا محامينا ...

الساعه المباركه ,,,نورت الموضوع طال عمرك ...

لا هنت .

[سعد الصميل]

الحلقة الثانيه

السلام عليكم .. عسانا ما ابطينا عليكم بس ؟

خلصنا الحلقة الاولى في ميلانو الجميله ... وجاء اليوم دور فينيسيا العائمه .. المدينة الجميله .. مدينة شوارع الماء .. فعلا انها جمال ايطاليا ..

بالطريق الى فينيسيا وهذا الريف ... شوفو الرودس .. وشوفو على يسار الصوره فيه شجر صغار .. هذا منتشر في كل طريق في ايطاليا بشكل عام .. وبعد التحري عنه اتضح لي انه شجر العنب .. وليس أي عنب .. العنب المزروع خصيصا ليكون خمر في المستقبل .! حسبي الله عليهم ياكثر مايشربون .. الديره كلها مزروعه عنب !




وهذي يسلمكم ربي بالطريق بعد .. وهي شركة كيو آيت التابعه لمؤسسة البترول الكويتيه ... طبعا هذي الشركة تارسه ايطاليا وهي المتسيده هناك .. وسمعت ان لها اكثر من 280 محطه في ايطاليا وحدها .. اللهم زد وبارك .. وقال ايش قال الميزانية تعبانه !! والقروض ماتطيح




الوصول هنا للمرسى او نقطة الانتقال الى فينيسيا .. تركب احد اليخوت او القوارب وتنتقل فيها الى فينيسيا العائمه .





وفي وقت الانتظار .. شفت العمود وشكله غريب ...





وبعد التقريب .. طلعت علوك .. ناس مجانين .. زباله بس شكلها حلو !





بانت فيلكا .. عفوا بانت فينيسيا .. وهذا منظر لبعض البيوت في فينيسيا ..





وهذا عند النزول في مرفأ فينيسيا والشارع العام للمشاه على الشاطئ .. ولاحظو الزحمه .. مالها حد ولا عد ..





وهذا احد سائقين التاكسي في فينيسيا .. في انتظار زبون






ولازم انك تركب قوارب فينيسيا بما انك جيتها .. مع انها غاليه شوي ويستغلون السياح .. ياخذ فيك فره صغيره بقيمة بين الـ 100 الى 120 يورو .. مايعادل اكثر من 45 دينار .. لكن بما انك وصلت فينيسيا .. انت مجبور على الركوب بأي سعر .. وفعلا تستمتع فيها وتستحق المبلغ اللي تدفعه فيها .. وهذا حنا في البداية ..




والتجول في شوارع فينيسيا المائيه ... شي جميل واحساس رائع والله . . شوف المتعه بس ..





شارع ثاني مليان من التكاسي .. وشوف البيوت بس يا سلام .. ايه نسيت اقولكم ان بيوت فينيسيا حاليا تبدأ من الطابق الاول ومافوق .. لأن الامم المتحده منعت السكن في الدور الارضي وذلك لأرتفاع منسوب المياه .. مما أدى الى خطورة السكن في الدور الارضي ... ويقال في تقارير ثانيه ان فينيسيا مهدده بالغرق خلال السنوات القادمه .. يعني نصيحه اللي ماراح لها يروح لها قبل تغرق .. على الاقل ياخذ منها شوية ذكريات ..




وهذا حنا في شارع حاره وحده وتواجهنا مع تاكسي ثاني ..




طبعا هنا طلعنا من البيوت كلها وللبحر الكبير .. علشان يدخل من فتحة ثانيه ودواعيس ثانيه ..





وهذا شارع عام او خط سريع في فينيسيا .. . ماتشوفون انه كبير ؟





وهذا يسلمكم ربي بيت احد اشهر ابناء فينيسيا ... هذا بيت ماركو بولو ... ومن لا يعرف ماركو بولو يبحث عنه في القوقل ... وللمعلومه العامه فقط .. ماركو بولو مستكشف ايطالي مشهور ويقال انه هو المكتشف الاصلي لأمريكا وليس كريستوفر كولومبس .. وهذا مايدافع عنه الطليان على انهم مكتشفون امريكا .. ومرينا على بيت سيد العشاق كازانوفا .. لكن للأسف ما انتبهت ولا قالي سايق التاكسي الا بعد ماطفناه ولا قدرت اخذ له صوره ..





طبعا فينيسيا مشهوره بالتحف والاقنعه والحركات اللي مدري وش تبي ..

وهذا محل للتحل وشوفو شلون اغراضه تسبب ازعاج للعين





وهذا اشهر ماقد تشتريه في فينيسيا ... الاقنعه الخاصة بالحفلات التنكريه .. بس للاسف فيه القناع اللي يكون نفس البرقع الاماراتي شكلة حلو واحلى من اللي بالصوره ..شريته وضاع مني وماصورته للاسف ... لكن البركه باللي صورتهم وهم اقنعة بس كاملة ..






وهذي الساحه العامه في فينيسيا ... ساحة سان ماركو .. وباين بالصورة برج الجرس في سان ماركو .. وهو رمز مدينة البندقية .. مبني من اكثر من الف سنه تقريبا ..




وهذي صورة كاتدرائية سان ماركو ووياااكثر المؤمنين عندهم ... طوابير مالها حد ولا عد على الكاتدرائية المخيفه ... وهذي صورة على الطاير ..





المهم بعد التعب والدوجه لازم تاخذ لك راحه وتغدى .. تبدا بالمقبلات ...




لين توصل المعشوقه ... بيتزا المارغريتا ... في ارض البيتزا .. ايطاليا ...





وبعد الغداء .. وخصوصا اذا كان الجو حار شوي ... لا تردد في طلب الايس كريم ..




وبعد الغداء ... في طريق توديع فينيسيا ...





وتوديع الزحام ... على فكرة .. شايفين البنت شنو لابسه ؟ .. الكبوس هذا مال القبطان .. الكل يلبسه في فينيسيا .. انا من الناس كنت جاي فينيسيا وعلى راسي كاب .. لكن شفت الناس كلها لابسته شريت لي واحد .. وعلى الاقل تاخذ لك شي ذكرى من البندقية ..




طبعا انتهت الحلقة الخاصة في فينيسيا ... والى لقاء ان شاء الله في لوقانو السوسريه الايطاليه ..

طبعا قبل الختام لازم نعطيكم الفقرة المتفق عليها في خاتمة كل حلقه ...

وجه من فينيسيا ...

صورت لكم هالمزيون قاعد يستعبط ...




ان شاء الله تكون عجبتكم حلقة اليوم ... ولنا لقاء ثاني قريب ان شاء الله ... في لوقانو .. السويريه .. ولكن بنكهه ايطالية ..

وهذي لقطات سريعه للحلقة الجايه ..



دمتم في رعاية الله