صاحب الفورد الذهبي

[عزوف]

:
:

في يومٍ ما وتقريبا قبل 3 أسابيع أو أكثــــر بقليل ..

صادفته على الدائري الخامس وكنت في طريق رجعتي للبيت قام مشكورا بإيصالي لحد بابنا ودش شارعنا وكان بيتنا في بدايته وعلى زاويه..

انتهى الموضوع ولم أُعرهُ أي اهتمام << عادي وتحدث في أحسن العائلات ‍‍!


في اليوم الثانــــي


وفي الساعه السابعه والربع فتحت الباب لقيته صافط عند البقاله اللي جدام بيتنا !

بـــس ماحطيت في بالي انه صاحبنا

لكــــن

شكيت بعد ماقام مشكورا ! بإيصالي لحد دوامي << صج ماكو شغل

وفي وقت طلعتي من الدوام لقيته ناطرني بالمواقف وما توقعت انه صاحبنا << علنياتها هالبنت

توقعت انه زوج وحده من بنات الدوام وناطرها عادي ..<< ماكو بهالبلد غير هالولد!


بصراحــــه ما ركزت في شكله ولو يمرني ألحيــــن ماعرفته ,أميــــزه بشغله وحده راح تعرفونها بعدين


المهم


قام أخونا مشكورا! بتوصيلي لشارعنا أنا صفطت بزاوية البيت وأهو دش بشارعنا صوب الزاويه الثانيه

تميت على هالحال أسبوع مو مستوعبه اللي يصيـــر ! والاخ يوصلني كل ظهريه والصبح ماشوفه عقبها قلت لا يمكــــن يا إنـــه مو صاحي أوأنا غلطانه ومشبهه على السياره

قلت يا بنت شلون بتأكدين ؟

إنــــي اطالعه وأحفظ شكله مستحيل اذا انا للحين مادري شلون صاير


قلت ما يبيلها << اخيرا اشتغل المخ
أحفظ أول 3 أرقام من سيارته 396!


وبجـــذي لو أشوفه بالظلمه بعرفه ! << صج مخ


خلــــص الاسبوع

وفي يوم كنت طالعه الساعه 8 بالليل بطلت الباب الا هو مار من بيتنا ومهدي عالآخـــر يمكن صدفه ! "" بس شكو"" مرابط بشارعنا ماكو شغل !


والله مت من الخرعه وقلت لا هذا مجنــــــون وتوني برجع ادش البيت وإلا أمـــي وراي "" هااااا علامج رجعتي ""

قلت بشـــرب ماي ! أكيد نشف ريجي من الخرعه << هالبنت أكبـــر جبانه

خذت أمي السويج وركبت السياره وطبعا ما شغلتها والا جان دشت بسور البيت وطلقها أبوي ! << أمحق بنت


قعدت مده أحاتي ومزعوجه وما أجذب إذا قلت مرعوبه "ماحاول يكلمني ولايضايقني أو أي شي "


بس ينطرني بعد الدوام ويوصلني بيتنا بكـــل هدوء لمدة 3 أسابيع تقريبا صادفته بالليل 3 أو 4 مرات !

لحد ما جا يوم وأصدر الوالد طال عمره قرار إن كل البنات يصفطون سياييرهم بالشارع الثاني يعني بزاوية البيت الثانيه صوب الدواووين لأنه بيحط مظلات والعمال بيجون من الصبح..

قعدت الصبح كالعاده بروح دوامي توني طالعه وإلا اخينا بالله صافط عند بابنا ! << باعها الرجال !


وكان صافط على طرف بينا وبين بيت جيرانا بالعرض!

ومبطـــل السياره ويجيك عالماكينه

لحظتها بغيت أموت من الخرعه وشوي وأبجـــي << صج خبله

بغيت أدش بيتنا وما أطلع بالمره حتى الدوام مابي أروح له لكن تعوذت من ابليس وشغلت سيارتي وحركت بسرعه ما عطيتها مجال تحتر


تدروووون شنو الصدمه ؟

الصدمه انه طلع جارنـــــــا..



عن جابر بن عبد الله أن رسول الله -صلى الله عليه وسلم- قال: الجيران ثلاثة؛ جار له حق واحد وهو أدنى الجيران حقا، وجار له حقان، وجار له ثلاثة حقوق وهو أفضل الجيران حقا؛ فأما الجار الذي له حق واحد فالجار المشرك لا رحم له، وله حق الجوار، وأما الذي له حقان فالجار المسلم لا رحم له، له حق الإسلام وحق الجوار، وأما الذي له ثلاثة حقوق فجار مسلم ذو رحم له حق الإسلام وحق الجوار وحق الرحم، وأدنى حق الجوار أن لا تؤذي جارك بقتار قدرك إلا أن تقدح له منها"



لقد بكى الرسول صلى الله عليه وسلم حق الجوار؛ فمن معجزاته أنه عندما سأل رجلا: هل قلت في نفسك شعرا؟ فاعترف الشيخ وقال: لا يزال يزيدنا الله تعالى بك بصيرة ويقينا وعرض سبعة أبيات نظمها في نفسه منها:

فليتك إذ لم ترع حق أبوتي ** فعلت كما الجار المجاور يفعل

قال جابر: فبكى رسول الله صلى الله عليه وسلم.


الموضوع بين إيديكم ولكم مطلق الحريه في المناقشه


لكــــن

بخاطري

سؤال للبنات

لو كنتي مكاني شلون بتصرفين ؟


سؤال للشباب

شنو رايكم بهالشخص ؟

تعتقدون انه طبيعي والا يعاني من شي !