## ايه بدوية ##

[اطياف الماضي]

قصيدة للشاعرة نوف
اتمنى ان تنال اعجابكم

لاخير بانسان رمى ثوب ماضيه=وبالتاليه يسعى لطمـس الهويّّـه
للشمس نور يحسب إنّه يغطيّـه=ما يدري كفوفـه بنـوره خفّيّـه
وأنا فدا الماضي ليا حل طاريـه=أنسى الحياة المترفـه والشقّيّـه
طبع البداوه عشقي وميّتـه فيـه=وكلّي فخر لاقالوا إنّـي بدويّـه
إيه ابدويّه آخذ الخيـر وأعطيـه=وأبادل المعطي جزيـل العطيّـه
إيه ابدويّه وأزرع الطيب وأجنيه=الطيب زرعي ما زرعت الرديّه
إيه ابدويّه لـو تزيـد المشاريـه=ببقى على عهـد البـداوه وفيّّـه
ماألاحق الموضه بسوق المسافيه=اللي لهن كل يوم روحـه وجيّـه
الله سترني ، ثوبهم ذاك ماابيـه=لاصار تطريزه بسلـك الخطيّـه
ماني من اللي أثبت العكس وأنفيه=وبيني وبين العيب حوض المنيّه
ومانيب دلّوعه ولا قلت : (أمبيه)=ولالي على كثر الدلـع مقدريّـه
رزينه وثقلي على الخفّ أبديّـه=دام الثقـل زينـه لعقـل البنيّـه
كرامتي نجم سطـع فـي لياليـه=ولاذلّني مخلوق ما دمـت حيّـه
لنفسي عليّه دين لاشـك أبوفيـه =ولا دفعت لمقتـل الخـوف ديّـه
وأقول للي جهل الأيـام معميـه=مولوده ، وعشت ، وبموت ابدويّه

تحيتي