"المجامل" بعض الأحيان مايقضي لزوم ** لا بو النفس الضعيفة لا بو جدّها !
مير تجبرنا العوايد .. وتجبرنا السلوم ** نكتم الأسرار يالين .. تاصل حدّها !
الردي لا طاح .. جعله يطيح .. ولا يقوم ** باح سدّه .. والنشامى ماباحت سدّها !
كلّ ماكبرت وضاقت على عيال الرخوم ** نِحتزم لأكبر مصيبة .. و "ناطى" خدّها !
جعل قسمي عند ربـّـي من خيار القسوم ** واحدٍ يعطي العطايا .. ولا يرتدّها !!
يا "وليـْـد" البطّ .. وشلون ما تقدر تعوم ؟ ** وأنت أبوك يعوم جزر البحور ومدّها ؟!
وأنت ياحلمٍ حلمته مهو مثل الحلوم ** ياضحيـّـة مزح الأحلام .. مدرى جِدّها !
أدري إن فالناس مُعطى وفالناس "محروم" ** إيه يابيض النوايا .. ويا مسودّها !
ويا ضميري لا يهمـّـك من الدنيا هموم ** الصعيبة حِلـّـها و "البسيطة" عَدّها !!
جات في سدّ الشوارب وفي سدّ الخشوم ** كبـّـر الضِيفة وعشّ الضيوف وغدّها !
والمراجل ماتوفـّـي بضافِية الهدوم ** كود بسيوفٍ يشوق النواظر حدّها !
والردي لو "يدرس" المرجلة في كلّ يوم ** المراجل عند أهلها يذعذع نِدّها !
يِعتبِر قسمه مثل قسم .. زاهية الرقوم ** يوم تكحل رمشها والقرون .. تكدّها !!
ماكسبت إلاّ رضى أهل النمايم والعلوم ** يارسول الحكي هات العلوم .. و ودّها !!
الصفوف إثنين .. هذا دفاع .. وذا هجوم ** وأنت أظنـّـك .. لا أنت معها .. ولا أنت بضدّها !!
شرهة الطيب .. تعدّاك .. للغوج العزوم ** وأنت "صلفات المشاريه" ما إنت بقدّها !
وأنت في سود الأظلـّـة تريـَّـح ومخدوم ** وإن ذبَحْك الجوع .. كَدّ التكاسي .. كدّها !!
سلطان بن وسام الهااجري ,,
30-12-2009, 12:32 PM
العرض الشجري