تاريخنا ما هوب فى طاش ما طاش

[سالم بن جخير]

صبحكم الله بالخير

البارحه غنّيت يوم الفكر شاش=وأسرجت قيفان البيوت الجزيله

مانيب أجيب ابيات شعرى على ماش=شاعر ولا اجيب البيوت الهزيله

يا نفس شومى واعتلى فوق مبداش=ومبداش روس النايفات الطويله

احداش عن درب المقفين واحداش=عن غلطة الجاهل وعن كل ميله
جعل الردى يفداش واللاش يفداش=واهل الحكى واهل النفوس الثقيله

يا غلطة الجهّال وشلون ننساش=شلون ننسى بين ليله وليله
المسأله ماهيب تصوير وافلاش=المسأله غايه وليست وسيله
يا شلّة الجهّال ما عاد منهاش=لا وصلت الدعوا لراس الفتيله
يا خيّلا البل طشت والراس لا طاش=ماهوب راكد لين يشفى غليله
حنّا هل الوقفه من الطاش للطاش=ناقف الى بار العميل بعميله
حنّا عذاب القوم مسرى ومغباش=اهل القنا واهل السيوف الصقيله
علومنا ماهيب فى راس قرواش=وماهيب فى راس الخبل والحليله
إلى نوينا الشى ينّاش ينّاش=ناتى على قبّ المهار الاصيله
تاريخنا ماهوب فى طاش ما طاش=تاريخنا يمطر سوات المخيله
ما عندنا هافى ولا عندنا لاش=يكرم نبانا عن دروب الرذيله
والمهره اللى عرشها داخل الجاش=ما مثلها فى ناقضات الجديله
حنّا لها بافعالنا ستر وفراش=حن سترها من دون برقع وشيله
حنّا لها محزم ومدفع ورشاش=من الجنوب الين حد المسيله
يا خلطة العنبر بعد ما كشفناش=مع الهوى رحتى بليّا حصيله
تسدّحى واللى تسدح بطرياش=اقصى علومه بين قاله وقيله
مثل القصب لو يجتمع داخل اغراش=يذوب لا من المطر سال سيله
هذا كلامى وافهموا زبدته كاش=والهرج دايم زبدته فى قليله
امّا يعيش الراس بالعز لا عاش=وإلاّ ممات العز دون القبيله