ياكم بغيت اشكي على امي من غيابك واستحيـت

[البنت الجزله]

السلام عليكم ورحمة الله وبركاته

اسمحولي اقدم لك بعض احلامي ....

يالغايب اللي لاذكرتك ضاق صدري ثم بكيت=بكوة غرير(ن)فاطمينه من قبل حل الفطام
اي والله اني عفت نفسي من فراقك وانتهيت=وانشد نجوم الليل عني وانشد اسراب الحمام
وانشد نسانيس الهبايب كيف من بعدك غديت=وانشد زماليق الصحاري وانشد ابروق الغمام
اي والله اني متعبه وبصدر الاهات انطويت=عيني معذبها السهر وعيون خلق الله نيام
مرت سنه وانا وحيده لا كتبت ولا قريت=وحروف شعري فوق صدرك يالورق راحت حطام
قام يتموجني عذابي في بحورك وانكويت=ولا وجدتك تنتشل قلبي من انقاض الركام
اي والله وربي غيابك مر وافراقك مميت=دنياي من بعدك كفن والارض من حولي ظلام
المح سرابك واتبعه واهلكت واتعبت وضميت=حتى غديت اشفق على الما من مواريد(ن)حيام
ياحسبك الله كان رحت وياهلا بك كان جيت=انت وضميرك واحذر احذر من عتابي والملام
ياكم بغيت اشكي على امي من غيابك واستحيت=واقول بنتك (....)تشكي من هواجيس الهيام
اشوفك بكل الشوارع واحسبّك في كل بيت=وعنك انشد اغصان الشجر مامرتك ريح الغرام
وانشد حدود الارصفه كانك بجانبها مشيت=ورحت انشد انوار المدينه عنك ويجف الكلام
حتى الملابس في عيوني سودت يوم اكتسيت=ولا بقى لي يا فساتين الفرح شف ومرام
كل البشر سالين وانا يشهد الله ما سليت=من جور همي قلت يالله بالفرج ياتي قيام
اثرك حلوم(ن) سايرت فكري من اول ماغفيت=حتى رفعت الجنب ياحلمي وقمت من المنام

اختكم البنت الجزله