الشاعر /مصلح بن عياد الشلوي ويرد عليه الشاعر / بريك عايض الشلوي

[فهدالشلوي]

هذه قصيده للشاعر المخضرم : مصلح بن عياد الشلوي ؛ والردود من قبل الشاعر : بريك عايض عفنان الشلوي

يالله ياللي عندك الرزق مقسوم=أنته إله العبد وأنته كفيله
أحمدك حمداً يازن الحج والصوم=حمداُ كثيراُ ما يمثل مثيله
ياما سمعنا من هواجيس وعلوم=قصه ورى قصه عريضه طويله
إنصد عن بعض السواليف ونشوم=عن مجلسٍ فيه النفوس الثقيله
مجلاسنا في رقةٍ حولها حوم=خيرٍ من اللجة والاريا الهتيله
شار المشير وصار للقوم قيدوم=حظٍ من المولى وصبر وجميله
شدوا شديد اللي يبى ديرة القوم=شديد قومٍ يطلبون العقيله
قومٍ تصالي قوم والراي مبروم=والنزل جنب النزل خيّم نزيله
الليل الاول فيه معطى ومحروم=والقوم سربه والمزاهب قليله
والليل الاخر منهو اللي يبى النوم=جانا من المنشا سحاب ومخيله
جانا بروقٍ مالها عج وغيوم=تلوفنا لوف العميل لعميله
ماأدري لبثنا يوم والا بعض يوم=من شاف سوّ الموت وآعزتي له
قمنا نبي نعجل على الرد بسهوم=ونطّوع اللي تايهن عن دليله
وشار المشير اللي مثل محسن التوم=تصبّروا حتى تحيل المخيله
مجينا صبر وتجلاّد وعزوم=ما هو مجي لركعةٍ وتهليله
والصبح يبدي فى المراقيب حثلوم=والنار حيّه عند خشم الفتيله
من غاب عن ذا اليوم ما هو بمرحوم=لا رحم أبو من لا يجي له يجي له
والعصر وإليا القوم في كل مزموم=بمشوكٍ مثل الجواهر هليله
حشمتك يادرٍ من الوسم ماسوم=وكبودأهلك إمن التحدّي غليله
جانا الفرج قدّام لا نرخص السوم=من فضل من يعطِ العطايا الجزيله
الله فرق مابين ظالم ومظلوم=تحاشد القوّات ضيّق مسيله
ما كنها الا قوّت الفرس والروم=ياويّها من قوّةٍ مستحيله
قوّات أبو فيصل سند كل مضيوم=الحاكم العادل مزبّن دخيله
قالوا لنا ياطالب الحق مخدوم=الحق واضح والامانه ثقيله
واليوم يادار الشلاوى إنجلا اللوم=تنزحت عنك الجموع المهيله
يافاتل اليسرى على غير معلوم=لاتفتل اليمنى على غير حيله
إعلم تراك من الغلط منت معصوم=الجور والبهتان أخذته وسيله
لاتبتلينا بالغلط دايم الدوم=حمل الغلط ماله جمالٍ تشيله
عندك مثل ماعندنا خبت ورجوم=ومجالس تبنى وظلٍ ظليله
الجمر من جمر الغضا والحطب كوم=والشر مرٍ علقمٍٍٍٍ حنضليله

الشاعر
مصلح بن عياد الشلوي

الرد عليه:

يالله ياللي تستر العبد بهدوم=خلاق سبع وسبع قدره وحيله
قابل دعى الداعي دعى كل مظلوم=ياعالمٍ مافي نهاره وليله
ياللي تكّون من عدم كل معدوم=ياللي خلقت آدم وأنته وكيله
جاء للبحر سبّاح شرّاعٍ يعوم=يفتل حبالٍ من سلوكٍ جليله
حيدٍ على عالي صعيبٍ على البوم=حيد الشياهين الحرار الأصيله
إليا إعتزى مصلح تعزويت وأقوم=نمرٍ على القاله يروّع صهيله
طلّق لتشبع ثوم زراعة الثوم=ويمنى الكرم فوق اليدين البخيله
كلٍ إله ديره وإله حد مرسوم=يالضايعين أهل القلوب الهبيله
جاني صديع الرآس ويطيح ويقوم=عارٍ يسحّب في خفاه وصميله
نوو برفض الأمر جمهور خيشوم=ونصب القرون لحكمنا ترتخي له
العصر جاهم مشعلٍ كنه نجوم=وراحوا جرادٍ طايرٍ من مقيله
ياللي تماري بالخطا ماأنت شغم=ومياللي تشب النار بين القبيله
إن كان حوت إسمار للقوم لاهوم=ياكم وياكم جت علاهم دبيله
ماأنت بقبيل إلنا يابو سيف مثلوم=لا تعترض لاهل السيوف الصقيله
يشهد لنا تاريخ عتبان وبقوم=حديدنا اللي من نخيله نخيله
الناس فيها دم شجعان ورخوم=زايد وناقص وإختلاف الفصيله
الحجه اللي ما لها ساس ورقوم=ثقله ونقله وآخرتها الفشيله
ياليت بعض الناس يحج ويصوم=ويترك شراب الهيل والجنزبيله
ياكاتب الحجه بلا سلم وسلوم=الليل الأظلم فيه عدله وميله
ياربعنا إن كان شجعان وقروم=الصقر مايرخي خياله وجيله
باكر يجي علم وخبر علم معلوم=يذيع مع ميسان قرية بجيله
الحاكم العادل فلا هو بمليوم=حضرة جناب وللركايب دليله
بعض الرجال ضعيف والقلب مسم=ومأهل العقول الناقصه والعليله
أزعل من اللي دايم الدوم كركوم=يدير راسه مثل راس الحسيله
يخالف الأرياء وعقده وحلكوم=إن عاش وإن مات الهضيله هضيله
أبو سعد فرحان يعيش ويدوم=رفيقي اللي أعتزيبه وأسيله
العزوه اللي بالبواضى لسيلوم=يأهل حراضه واردين الطويله
يقول إبن عياد للقوم قيدوم=وقلنا فداك ضرى بدمه وسيله
لا قلّت الجمّه ماأغرف بمشروم=أقطف زلال الجم وأترك نثيله
دنياً تقلّب بين فايز ومهزوم=والغابي أظلم بالقتيل وقتيله

الشاعر
بريك عايض عفنان الشلوي

[عيد بن شدقان]

فهد الشلوي

صح السانك والسان الشعّار



ولاهنت

والله يعطيك الف عافيه


على ما نقلت لناا

[بندر]

إنصد عن بعض السواليف ونشـوم
..............عن مجلسٍ فيـه النفـوس الثقيلـه
مجلاسنا فـي رقـةٍ حولهـا حـوم
.............خيرٍ مـن اللجـة والاريـا الهتيلـه
.
.
الله الله

لاهنت يالشلوي ..

وصح السان الشعّار ,,

[عبدالناصر آل عبدان]

شكرا اخي


على النقل



وصح الله السااانك



وصح الله لساااان شااااعرها




ودعتك الله

[فهدالشلوي]

السلام عليكم ورحمة الله وبركاته ،،،،،،


الي الاخ العزيز / عيد بن شدقان بيض الله وجهك على المرور وشاكر لك وياجعل ربي يسلمك ،،،،

*******************************************


والى الاخ الكريم / راعيها اشكرك واشكر مرورك العطر ولك مني اعطر التحايا وازكي ترحيب ،،،،،،،،،،،،،،


*******************************************


والي الاخ الفاضل / عبد الناصر الفهاد ياجعل تسلم إيدك الكريمة وشاكر مرورك الطيب ولك مني تحية مبخره بالعود والمسك والعنبر ،،،،،،،،،،،،ن

*******************************************