قصيدة في الأستاذ حجرف بن محمد

[العضياني العتيبي]

هذه القصيدة قلتها في سعادة الاستاذ /حجرف بن محمد العجمي مدير مستفى الامير سلطان بن عبد العزيز بمليجه وذلك شكر وعرفان وتقدير لوقفاته معي والتي ليست بغريبه علية ولا على العجمان عامة وهم المشهورين بالشجاعه والكرم والتخوة ونعم الرجال واليكم القصيدة:

يوم القلم بالحبر سالت حروفه= جاهيض صدري بالقصايد من اقصاه
ومن شذ منها قلت جعله ذلوفه= واللي بقى من زرع الافكار جبناه
وسويت منها للقصيدة بروفه= وقطفت من زرع البساتين مشهاه
واليا بدعت القاف بالفكر احوفه= واختار منها اللي جزيل بمعناه
ابني القصايد طوفة فوق طوفه= واليا بنيت الساس جودت مبناه
ماهو طرب للشعر والاطروفه= والا التغزل ويني اليوم وياه
لكن وقتي صادفتني ظروفه= وقت تحداني وانا ازريت لاحداه
ونصيت قرم من رجال معروفه= قرم ولد قرم تنومس سواياه
ذخر الرجال اللي ترد الحسوفه=ابومحمد جعل الانذال تفداه
من روس قوم للمراجل شغوفه= على الكرم والطيب نفسه مضراه
عجمي وفعله كل حي يشوفه= ونعم بربعه في نهار الملاقاه
اهل الوفا والجود واهل المروفه=الكل منهم تكسب الطيب يمناه
عجمان منهو يحتدنه ظروفه= ويزبن لهم ياصل لشي تمناه
رجالهم في العسر يكرم ضيوفه= وان جات حزات المواجيب تلقاه
ابومحمد مانسيت معروفه=ومادام راسي حي ماوالله انساه
مانسى معاريف ولاانسى وقوفه=وياسعد منهو فالمواقيف ينخاه
دايم على الامجاد نفسه شفوفه= ويحفظك ياعود على الخير رباه
ياذخر حر يشبعنه كفوفه= حر ولد حر بعيدة مداياه
ويابومحمد لوكتبت معزوفه= كل القلم ما يكفي اللي كتبناه
مار العتيبي قال شي بجوفه= ولك عهد معروفك فلا والله انساه
ويحفظك رب البيت من كل خوفه= ويوفقك للي يحبة ويرضاه

وسلامتكم
عبد المجيد بن محمد بن مطلق بن رايز العضياني العتيبي