قصيــده : مقـارنه بين السيارات والإبل

[مـحمـد]

هذه قصيده لاحد الاخوان نشرها وماحب يكتب اسمه

وقال لي اكتبها وذيلها باسمك يقصدنى .. قلت له لا انا لست بشاعر

واضعها بين ايديكم وتكون المقارنة بين السيارة الحديثة والجمل " شقران " وسيلة النقل القديمة :

نحمـد الله وارد الستين عانه = واردٍ قـبل الحـديـد يـوردونـه

ما يعبا من شراب القيز خانه = ولا وقف وسط الكراج يوضبونه

المكينه مطرق من خـيزرانه = كامل بالوصف والشمـعة عيونه

والجما كبوته والبوري السانه = والمساعـد ياولـد حربة سنونه

والاديتر صرته مظرب ابطانه = ديـتره يا بو سهـل ما يلحمونه

وان ركب راعيه ما مله مكانه = وان طرش صوب البلد ما يجرونه

وان عطا جو الخلا زين اهذبانه = وان تعرض رمـلةٍ ما يسعفونه

نمـرته وسمه على خده بيانه = وان وطاله مـركزٍ ما يسألونه

وارد الرحمن يا زين اسهيانه = يعجب اللي فوق وسقه يركـبونه

خالـقه ربه وخالـقنا اوزانه = ما يـورد من بـعيدٍ يصـنعونه

مير شان الوقت واقفى به زمانه = وانقطع شقران يا اللي ترغبونه

وتم قولي ذكر رب عـز شانه = ذكر رب كل الامـه يـشكرونه

=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=

أرجو انى وفقت في اختيار القصيده وان تحوز على اعجابكم

ALAJMI