ياناصر خذ وصاتي لا تطيّر

[منصور بن منيخر]

ياناصر خذ وصاتي لا تطيّر=هذا علمي مدام أنك صغيّر
تري الأنسان مهما طال عمره=يسيّره القدر ما هو مخيّر
عليك بطاعة الله في صلاتك=وصاحب في حياتك كل خيّر
تري الرجال يسأل عن قرينه=وهذا الوقت للعاقل يحيّر
وضيفك كرّمه وأحشم جنابه=وجارك لو تغيّر لا تغيّر
وبيتك لا تصكه دون ربعك=ولاالعاني ولا دون المسيّر
وصمتك خير من كثر الهذاري=لا تمزح مع سفيه ولا تعيّر
وسرّك للعواذل لا تذيعه=تري الأقدار بأمر الله تسيّر
وصبرك للقضا واللي يصيبك=جزاه الخير كلّه لا تطيّر
ولا تشرب ضماء من كف غيرك=وحبل الكذب لو طوّل قصيّر
وبنت الاش لا تطلب نسبها=ولو كانت كما الريم المذيّر
مشاكيل العرب في كل ديره=لكن المنسب الطيب تخيّر
تعلم من دروسك ما يفيدك=ظلام الجهل وألا العلم نيّر
نصايح قلتها لك من تجارب=تراها خير من شيك(ن)مجيّر
وصلي الله علي محمد وسلم=ومن يمشي بهديه ما تحيّر