( مســاحـــه لسفّك دمـــاء الشّعـر )

[نايل الظفيري]

لو كل شي ٍ طرى في خاطري قلّته
ما كان مات الكلام بداخل أعماقي



حلم ٍ من أعوام ودي به ولا طلّته
تموت بعض الأماني والله الباقي



يا ليلة البارحه والبوح أشعلّته
من يوم صمتي طفى في لحظة إشراقي



يجذبني الشعر وأنساب لمخيلّته
وأصوّر اللي تهيّا منّه ولاقي



صوت الحزن من ردات الوقت مولّته
مدام الأيام تعزف جرح خفّاقي



الهم يثّمر وتكبر حيل منزلّته
والليل غصن تدلّى منّه أوراقي



الجرح داخل ضلوع الصدر كبلّته
والدمع مزن وسحاب المزن أحداقي



اللي على الناس بديته وفضلّته
ودي بقربه وهو ودّه على فراقي



وأنا الخطا لو بدر منّه تحملّته
ولو غيره اللي خطا ضاقت بي أخلاقي



لو مرّ طيفه على بالي تأملّته
وأبحرت من واقعي في مركب أشواقي



الحب أصعب من اللي قد تخيلّته
لله درّ الغلا يا كيف حرّاقي



يا أمنيه ضايعه ويا حلم ما طلّته
تموت بعض الأماني والله الباقي