فات الاوان ومابغيناه ماصار = يانور عيني آسف وسامحيني
حل الفراق وحبنا صار تذكار = واللي جرا مكتوب فوق الجبيني
مارحت عنـّـك دون مابدي بالاعذار = عذري وقلته يالغلا واعذريني
ادري قسيت وكان هرجي لك امرار = يوم ٍ قسيت وقلتلك فارقيني
ماكان قصدي اشعل بجوفك النار = القصد من هرجي ابي تفهميني
ولاّ ترى انتي خابره كل الاسرار = عندك تراني بحت كل الكنيني
يشهد علي علاّم غبات الابحار = ياويش سوّا بعدك اليوم فيني
اسري لكم في تالي الليل محتار = والهم من جور الجفا معتميني
اجي وانا متحطم ٍ واشبح الدار = ثم اذكر اللي صار بينك وبيني
يومك معى الشباك جعل ٍ بالانظار = وانا عجول وخايف احد ٍ يجيني
ياجعل يسقا ذيك الايام بأمطار = لامن طرت هلّت من الدمع عيني
ياحيلة الله عقب فرحات وانوار = اظلم سنا نوري وفرحي حزيني
عز الله ان الوقت لو زان دوّار = كشّرلي بنابه وضيـّـع سنيني
مانيب والله عارض بحكم الاقدار = راضين في حكم الولي مومنيني
وشكواي لله بقضي العمر صبـّـار = بصبر ولابه حيلة ٍ في يديني
وان حلّ بي يازين قصـّـاف الاعمار = تراه من زود الوله والحنيني
قولي رحل واقفى حزين ٍ بالافكار = وترحـّـمي فوق القبر واذكريني
والبعد آفه عند الاحباب دمـّـار = وانا دمرني بعدك وسامحيني
وسلامتكم000000000
الشاعر / سعود رتيبان الجويّر
العرض الشجري