الأبـــــواب الـمـغـلـقــه

[بخيتان اليامي]

أتمنى أن تحوز على رضاكم جميعا وأن تلقى القبول في هذا المنتدى النير بوجودكم،

يا شينها لا قفلت كل ألابواب=في وجه رجال ٍ يدوّر بصيره

عل وعسى وشلون من ضمن الاسباب=وضع يفجر داخل الجوف حيره

أن جاء يدور حل من يم الاقراب=فكر بمنة من يبي يستشيره

أقراب لأحتاجوا وأن أحتاج فأغراب=بلواه من وجهة نظرهم صغيره

منهم ضعيف النفس ما يحسب أحساب=همه يعيش وبس من جهد غيره

وأن جاء يقول الحل في بيت الاصحاب=ناسي مفارق ليل حدد مصيره

في ظنه النسيان يشفع لمن غاب=للي ترك خله و سافر لديره

هزه شعو ر أن كان خلّه معه تاب=و الا بقى ما بين شك وغيره

وفجأه يحس القلب يرجف ومنصاب=و خيب حبيبه عاشق يستجيره

في وقتها الشمات يضحك بالانياب=و يقول ما قد قلت لك تستخيره؟!

لو هو درى أنه ساكن تحت الاهداب=وأن العيون أن راح تصبح جهيره

وأنه يحكم القلب و يشد الاعصاب=وطعم الحياه تكون دونه مريره

وأن الثواني أسنين في سلم الاحباب=وش عاد لو فارق عشيرعشيره

ما لام من جرحه له أعوام ما طاب=و لا نصح تايه همومه كثيره

لاشك ما جرب ولا شاف الاتعاب=ما يدري أن العشق ناره سعيره ؟

وأن الزمن ظالم تحدي ولا هاب=ومن عانده وقته حلوله عسيره

هني من يلقى مفاتيح الابواب=حتى ولو باب ٍ وخلفه بصيره