عضيم ساري

[الشلاقي عز]

بسم الله الرحمن الرحيم
السلام عليكم ورحمة الله وبركاته

قصيدة لا تحتمل كتابة مقدمات ففيها ما يكفي بالنسبة لي
ولكن هي بمناسبة قرب ربع قرن لي كان العقد الاخير منه يحمل مواجهات
واكتشافات وشجون كثيره

قاربت ربع القرن و احوالي احوال =طالع و نازل مرتفع و انحداري
لو كان لون الراس اسود ولا زال =فالقلب شيبه من هموم و طواري
و خاويت عقدٍ بأخر العمر قتال =و من ما لفاني منه صرت استشاري
قمت اعطي العالم علاجات وامصال=مما جرا لي صرت واعي وداري
أضحت بي همومي طروقن و موال =جابه زمان شفت منه العزاري
عقدٍ مضى ما شفت به في و ظلال =غير السموم و لاهبه و السماري
و أخذت منها دروس ما تشترى بمال =وصفعات منها العين هلت عباري
حظوظي تقهويني من المر فنجال =و ما ساقته لأم الشحم و اليساري
باللي كتبلي راضي روض وامحال =والعبد صابه ما أنكتب لو يداري
و مشكاي يابن سمير ما كل رجال =أفضح له الخافي و أفض الستاري
كود الذي يقرن مقاله بالافعال =شرواك يا ذيبن عوى بالغداري
من روس قومٍ تكرم لحي و سبال =تذبح بضيافته عراض الفقاري
شكواي يمك يا فتى الجود ..الانذال =كثروا هل النمات والغيض فاري
اللي على النمات ضارين وعجال =اسبق من البورش الجديد وفيراري
واللي خذوا في قرض الأعراض تجوال=ناس وجيهه من حياء الرب عاري
أغرب بشر شفته على مر الاجيال =في لحوم ناسه ذاك بايع و شاري
و ناسن تخاوي من هل الجاه و المال =و ليا قضى الحاجه ذلف و استداري
شاهدت منها انواع و ارناق و اشكال =و كله تتالى في مصب و مساري
منهم غدت روحي على طارف الجال=و بأسبابهم يمكن يجوز انتحاري
مجلاسهم يضغط من القيل و القال =من علمهم يا زين فرقى الدياري
صوب الذي تنهي غثاء البال بالحال =جرد الفجوج اللي تسمى صحاري
جعل و عسى ربي يغيثه بهمال =و من جوده تصير المحيله خباري
و تشوف من يرحل غدى اليوم نزال =و كلٍ سرح مع غاليات البكاري
بدوٍ تميز في نقى القلب و البال =و ما ناشها خبث الزمان الحضاري
و أدله و ثم أنكس عقب ماني بعال =وارجع و افكر و استرد الطواري
وأذكر هوى زين الحلا لابس الشال=اللي لعب بي لعبة عضيم ساري
غرون غرير و غض للقلب نتال =و أقفى بقلبي راح زين المواري
و ذكرى المفارق بيننا وقع زلزال =يوم أبعدت لديار ما هي بداري
و ما بيني بينه ماسنجر و جوال =على الشرف حبي لها و الوقاري
من حول عشر سنين ما عفت الامال =عل الحظوظ تصير فوق السواري
و صفيت أنا أبياتي و يممته إرسال =يم الذي عند الخوي ما يداري