مشاركتي الأولي ,,,

[الدالوب]

بسم الله الرحمن الرحيم
مساكم الله بالخير :
هذي أول مرّه أنشر وأشارك بقصيده لي ,,,
عساها تلقي ولو القليل من قبولكم
ولاني بغني من ردودكم ومن إنتقاداتكم

إن كان قصدك تغلا قلتلك غالي = وإن كان قصدك جفا هذي مواريها
تري التغلي يزيد الهم في حالي = والحال حالي كثير الهم طاويها
يا بنت أنا صارلي أيام وليالي = أسهر و عيني سهرها بين ٍفيها
يابنت شوفي غرامش ويش سواّلي = قصة غرام ٍولادري ويش تاليها
البعد شين... وفال الله ولا فالي = بس الهواجيس تطريلي وطريها
وان ضاق صدري نصيت المرقب العالي = روس المراقيب تغني عن مواطيها
أرقا براس الطويل وكنّه أشوالي = واخذ وسولف علي نفسي وسليها
أجلس لحالي ما عندي غير جواّلي = وخطوط الإرسال مغلقها ومنهيها
وليا طرقني هوا الغربي وانا سالي = آخذ عقالي مع الغتره ووطيها
وليا طرالي قعدت اجر موالي = وليا كتبت القصيده رحت اغنيها
وليا تذكرتها ماكنّي إلحالي = كنّه يسولف علي والحال يرثيها
يقول والله تري ماغيرك إباّلي = بس المقادير تجبرنا ونمشيها
وشـــوف عينه من الأحزان ذباّلي = عينه تهل العباير مايداريها
وانا علي شوفته مانيب محتالي = قمت اتصبر ودمع العين كانيها
ضاعت اعلومي وضاع إلّي علي بالي = ياشين ساعة لقي والبعد قافيها
كنّي قريص ٍتوعي وانتبه تالي = في مرقده والعقارب سمها فيها
واقفيت من عندها والهم يبرالي = وشوفها مقفيه تقصر خطاويها
أقفت وعيني علي فرقاه هماّلي = العين وش عذرها لاغاب غاليها
حتي النّهايه علينا دمعها سالي = تزهم علينا وتبكينا ونبكيها
واليوم يابعد منزاله ومنزالي = بيني وبينه اجبال ٍفي رواسيها
إلّي حداها عساه يحد للجالي = مدري ولد عمّها ولاّ بناخيها
واليوم مالي بوسط الدار مدهالي = ضاقت علي المدينه مع ضواحيها
أبعد عن الناس واجلس في الخلا الخالي = واشبح نجوم السما واسري مساريها
أثر الهوا مرّث ٍحزني وسلاّلي = حتي الزّمن لانوالي مايثنيها
والحظ لامن عدلته عوّد ومالي = له عادة ٍحالفنّه مايخليها
وبطلب الله عسي الأيّام تصفالي = عسي الليالي تعدّينا بلاويها
وين انت يلّي إليامن جاك مرسالي = إفزع تري النفس تبغي من يهديها
وانا من إلّي لهم يوم أشهب اللاّلي = عجمان وسعد منهو يحتمي فيها

وسلامتكم...
ونعم في جميع القبايل

اخوكم / عبدالله آل مصرا
للتواصل :
asd-a-m@hotmail.com