بـدوٍ خلقنـا الله وفينـا صعاطـيـر=نرقى المعالي نحتمـي عـزة الـذات

[جطلي بن فهد]

تمنى ان تحوز على رضاكم

قالوا علام اللون جـاء فيـه تغييـر=وجاء فيه من وسم البداوة علامـات
مالك ومال اللـي يبـون المخاسيـر=ضيّعت مالك بيـن روحـة وجيـات
خلك مع الأسهـم وصنـدوق توفيـر=والبـل تغيّرهـا بشيـك وبطـاقـات
وقنّن مصاريفك علـى أقـل تسعيـر=وإحسب مصاريف الشهر بالنهايـات
قلت البداوة وسمهـا عـز .. تقديـر=هي كارنـا واشموخنـا والشعـارات
فيها دروس الصبر والطيب والخيـر=وفيهـا دروس المرجلـة والكرامـات
بـدوٍ خلقنـا الله وفينـا صعاطـيـر=نرقى المعالي نحتمـي عـزة الـذات
نكرم سبال الضيف حشمـه وتقديـر=وخوينـا والجـار يلقـى المسـرات
بدوٍ نخيل المزن في صبح وعصيـر=وهاذي لك الله وحدها رفـع هامـات
والبل خلقهـا الله بحكمـة وتصويـر=ولها معزة مـن عصـور البدايـات
فيها انتخا عنتر وابو زيـد والزيـر=ومن شانها قامت معـارك وغـارات
واليوم ما نسمع نصايحك يـا مشيـر=وعلمك ما والله هـز ليـه قـرارات
هـاذي نياقـي دقهـا والمعاشـيـر=ولي فاطرٍ تسوى كنـوز وعمـارات
ينساح بالي مـا يجـي فيـه تعكيـر=لاجيت قدم الـذود أغنـي بشيـلات
ولي شايبٍ قد قيل ريـف الخطاطيـر=الصيت يبقى كان راعيـه قـد مـات
وأنا شريت الطيـب وخـوّة مناعيـر=أتبع خطـاوي شايبـي والوصيـات
ولاني بمن يلهـث لجمـع الدنانيـر=اللي عن الواجب يجي فيـه صـدات
اللي يحوص إن شاف خطو المسايير=وإن جاء يسوق المال جاء فيه رعدات
عذر البخيل النهي عـن كـل تبذيـر=يحرص على السنة في ذالعلم بالـذات
ورزقي على اللي يرزق الذر والطيـر=الـرزق بيدينـه ولا فيـه شـكـات