الــجـــادل ...... (( مصافحه اولى ))

[عبدالله خلف الخالدي]

ابناء هذه القبيله العريقه يشرفني الانضمام اليكم
واشكر من قام بدعوتي الى هذا الصرح الشامخ .


اليكم هذه القصيدهـ واتمنى ان تنال على اعجابكم .

كريم يابـرقٍ سـرا يمـة انصـاب=اخيـل نوضـه بالسمـا لاشتعليـا
وعسى سحابٍ في طرفه البرد ذاب=يسيـل ليـن يعـل قـاعٍ محلـيـا
وتنبت على خده زماليق واعشـاب=ليـن الخزامـا تختلـط بالنفلـيـا
ويغرد القمري علـى كـل مرقـاب=بلحون للحـون الطـرب تشتمليـا
حيثه نزل به سيد تلعـات الارقـاب=هاك اللعوب اللـي سكـن بالفلليـا
الجادل اللي لو رحل حـي ماغـاب=بيـن الحنايـا ساكـنٍ مـا رحليـا
الجادل اللي لو بهـا شـي ينعـاب=يمكن بهـا زود السحـا والخجليـا
سهوم عينه من تحت عكش الاهداب=ترسل علامـات الخطـر والوجليـا
والنفس تحضنها هلاوي وترحـاب=والقلب ريضانه من الشـوق مليـا
ونفسي وقلبي دونها صاروا احزاب=كـلٍ يبيـه بحضـرتـه لانزلـيـا
انساح باله وابتهج طارت اسـراب=بسمـه تمـازج طيشهـا بالجهليـا
وعقلي اذا من ذكرياته فتـح بـاب=عـن المحيـط الداخلـي ينعزليـا
كذا من الله والغـلا مالـه اسبـاب=معي انخلـق حبـه نمـا واكتمليـا
منهـا تعلمنـا تشّـراه الاحـبـاب=ومنهـا تعلمـت الهـوى والغزليـا
ومنها تعب قلبٍ سبايبـه منصـاب=لاحل طـاري مـن عربهـا جفليـا
ومنها تعلمنا على ضبط الاعصـاب=لاقـام يخلـط بالـدلال الزعلـيـا
العام جاني منـه مشـروه وعتـاب=وعتابه احلى مـن رحيـق النحليـا
يابنت وقتـي ماصفالـي ولا طـاب=يوميـن والباقـي خمـال وخلليـا
الوقت قبلي ماخدم نـوت وعقـاب=زوّد عليـه المشكـلـه والعللـيـا
لكن غلاك بخافقـي حـي ماغـاب=بيـن الحنايـا ساكـنٍ مـا رحليـا

ولكم تحياتي

عبدالله خلف الخالدي