يــا عـبــيــــــــــــــــــــد!!........مصافحه أولـــى

[ابن سرحان]

مسيكم بالخير..

اهدي لكم اول قصيده وان شاء الله انها اول الخير..

قصيده وجهتها لابن عمي.. عبيد بن معدي بن سرحان

يالله يامن تبدي الخلق وتعود=تفرج لقلب بيُح الوقت سده
صارت هواجيسه مصادير و ورود=يالله تزينها تراها.. مصده
ياعبيد ياللي مايبي طيبك شهود=ريف الضعيف اللي غدا الوقت ضده
اللي ليا ضاقت..يرقيني سنود=ذاك الذي تستاهل الجود.. يده
ياعبيد..تدري لي انا عام او زود=معاد اميُز.. مزح وقتي وجده
اصبر واداري كايد الهم..ويزود=يالله..عسى مايبلغ الصبر حده
معاد باقي شيٍ اذخره ياكود=شيٍ على روس الأصابع..تعده
ما غير اداريها ليا هبت النود=قد لي على ذا الحال ياعبيد مده
أخاف يلحقني من الناس منقود=ويقال..ماضرَا على النفس شده
واللي جزا معروفي العام بجحود=لا يحسب اني يوم قفَى..بردَه
مابيني وبينه مواثيق وعهود=ولا هوب ندٍ لي ولا نيب ندَه
واللي جزاني بصدُةٍ مالها حدود=لا يحسب انه لو رجع لي..بصده
كانه بيذكر ماضي الوقت..ويعود=قله..تراني مانسيت الموده
وياعبيد..خذ قولي ترى القول مردود=وان كان جاك العلم ياعبيد..رده
واذا بلاك الله من الناس..مقرود=بابٍ يجيب الريح ياعبيد..سدٌه
ولا تهد طيرك..وفي السما برق ورعود=جوٌد سبوقه..لانجلى الغيم..هده
ولا صار حبلك..مع هل الطيب ممدود=لى اشتد لك أرخه..واذا ارخوه..شده
قد قيل.. بالك تامن الذيب في الذود=وقد قيل.. شيٍ تستحي منه..بدٌه
ياعبيد..شفني ما بقى في مجهود=لد النظر ياعبيد..في الحال لدٌه
جيتك وانا حبل الرجا فيك معقود=ياعبيد..سيفي ثلٌم الوقت حده
ياعبيد..يمنعني من النوم شارود=والفكر يلعب.. بين جزره ومدٌه
عزٌي لحالي كل ما هبٌت النود=وعزٌي لقلبٍ بيٌح الوقت سدٌه

عساها اعجبتكم؟؟؟؟؟؟!!




اخيكم..

نايف بن ناصر بن سرحان