إعــتــرافـــاتـــي .. نص جديد لـ كاسب الطيب .. !!

مناحي الصميل · #1 13-12-2006, 01:25 AM

صلوا على النبي .
.
.
.
.
.

لبّا عيونش ياملاك الغنادير = لبيه يارمش(ن) يزوّد حلاها
يا تل قلبي تلّة الجمس للقير = من سبّتش حالي تدّور دواها
من يوم شفتش صرت انا عاكس السير = هي بلوة فيني ومدري بلاها
من عقب ماشفتش عيوني مساهير = والنوم عن عيني يطوّل جفاها
وفي داخلي علّيت صوت المزامير = ودقيت طبل الحرب معلن بداها
وصطفّ لك جيش(ن) رجاله مغاوير= تبطش في عمر اللي يخالف هواها
نعيش قصتنا ونحتاج تصوير = تصوير حالتنا وواقع رداها
من حد إيران(ن) الى حد كشمير = حبش تعدّى ديرة(ن) في حماها
عزّي لصوتش متّر القلب تمتير = لا من سمعته زاد حالي شقاها
وتقول انا حبيت والحب ذا غير = والعين مابه شخص مثله ملاها
هي هرجة(ن) تمشي ورا مقصد الخير = والا كلام الصدق يقصر عناها
(( ان كان قلبش من هواة الدنانير = قلبي يساوي دولة(ن) في عطاها ))
أبغيش قدامي واصبّحشِ بالخير = وبالليل امسّيها ويسعد مساها
ان كان تنفع بيننا دهنة السير = والله لأدهّنها واكمّل معاها
ماقلت انا وايل ولا سالم الزير = وما قلت انا شيخ(ن) وادور ولاها
لكن في حبي بأسوي اساطير = حتى توارث بيننا وانتباها
وتجول في بالي صنوف المقادير = بأعطيش منها ما يبيّن خفاها
( ليش الجفا والصد وكثر المعاذير = وتنهيدة الفرقا وصلني صداها )
خلّيش بالقصه وبأعطيش تعبير = احداث قصتنا طويله مداها
قد شفت نسيانش وبأعطيش تحذير = ماأنساش لو الناس تنسى نماها
من يوم شفتش صاح قلبي تبااااشير = صاحت ضلوعي كلها .. وش بلاها ؟؟
حالي عقب صدّش تسمى تعاسير = لا عاد تنفع شرهة(ن) في رجاها
الصد ياتيني كذا .. دون تبرير = والقلب يصرخ من هموم(ن) شكاها
الحال تعبانه وتحتاج تصبير = ماتبغي الا دوم صفّك معاها
انشد عن احوالي وبأعطيك تقرير = عن حالتي حتى تقدّر وفاها
وفي آخر ابياتي ابأعطيش تذكير = مكانتش بالقلب محد(ن) خذاها

.
.

وسلامتكم ..

منـــاحي بن فــهـــاد ..

ناصر بن فالح · #2 13-12-2006, 01:38 AM

صح لساانك يامناحي

ولاهنت طال عمرك

مناحي الصميل · #3 13-12-2006, 02:17 AM

ارررحب ارسطووو
صح الله بدنك
ولا هنت على مرورك الوافي ..

ولد الفرسان · #4 13-12-2006, 02:20 AM

لبّـا عيونـش يـامـلاك الغنـاديـر
لبيـه يارمـش(ن) يـزوّد حـلاهـا
يا تـل قلبـي تلّـة الجمـس للقيـر
مـن سبّتـش حالـي تـدّور دواهـا

ياسلام

حلوة القصيدة

ولاتحرمنا من الابداع المتدفق

لاهنت

يامناحي وصح لسانك

مناحي الصميل · #5 13-12-2006, 02:26 AM

اررحب ياولد الفرسان
صح الله بدنك

ولا هنت على مرورك الكريم ..

مودماني · #6 13-12-2006, 03:42 AM

ياسلام ياسلاام

اي يامناحي هذا القصيد ولا بلااش

للامانه مختلفه جدا عن قصيدك الاخر

كنت اقرالك من اجل القرائه فقط في قصايدك الماضيه

لكن هالقصيده غير لامست الشعور والاحساس

خلّك على هالروح وثق تماما سوف تكون شاعر لك بصماتك

اخوك مودماني

فلاح بن ملبز · #7 13-12-2006, 03:51 AM

ارحب ارحب يا ابو فهاد

وصح لسانك عدد ما خطيت ودبل

على ذا القصيدة الجزله يا جزل

ولاتحرمنا من ابداعاتك يا السنافي

ولاهنت

ضيّ القمر · #8 13-12-2006, 04:07 AM

وفي داخلي علّيت صـوت المزاميـر
ودقيت طبـل الحـرب معلـن بداهـا

وصطفّ لك جيش(ن) رجاله مغاويـر
تبطش في عمر اللي يخالـف هواهـا

كاسب الطيب (مناحي بن فهاد)

صح لسااااااااااااانك مليوووووووون ولايكفون

وعز انها قصيده جزله وتوصل للقلب من غير تكليف

سلم بوحك ولاهنت وكلنا بانتظار جديدك الرائع

كما تعودنا دايم والرائع يبقى رائع

تقبل تحياتي

اختك / ضيّ القمر

مناحي الصميل · #9 13-12-2006, 05:32 AM

مودماني
ارحب ارحب تراحيب المطر ..
تسلم جعلني ماخلا منك ..
وصدقني كلامك كله على العين والراس ..
والله لا يهينك وبيض الله وجهك ..

مناحي الصميل · #10 13-12-2006, 05:33 AM

اررررحب يا فلاح

صح الله بدنك يالقرم
ولا هنت على مرورك الجزل ..

وبيض الله وجهك يالسنافي ..