شاعر حضر زواج حبيبته وجاب العيد

[هــــــيا]

هذا الشاعر حضر زواج حبيبته وجاب العيد

و هو يخاطب بهذي القصيدة زوج حبيبته

شوفو وش قال :


أبد .. ما جيت ابارك ولكن جيـت باوصّيـك
على اللي ناوي ٍ تدخل بهـا الليلـه .. مُعذّبْتـي


ترى لولا الظروف اللي عطتْك وحدّت محاكيك
قسم بالله ما تدخل عليهـا لـو علـى رْقبْتـي


ولكنّ النصيب اقوى ولا ادري ويش اسوّي فيك
نعم .. صارت معزّبتك .. ولا صارت معزّبْتي


كذا شاءت بنا الأقدار تحرمني لجـل تعطيـك
كذا لازم عشان تفوز إنت .. أخسر بتجربْتـي


تراها غاليه جـداً .. وتكفـى .. والله يخليـك
تـدللها .. تدلعهـا .. تنسّيـهـا مصاحبْـتـي


أنا من كثر ما اغليها أحس اني بديـت اغليـك
ولا تسـأل بأيّـة حـق ولا ّ وش مناسبْـتـي


لإنك لو بتسألني بتسمع شـيء مـا يرضيـك
لذا ياخـوي لا تسـأل ولا تسمـع لأجوبْتـي


أبيك تحطها في داخل عيونـك وبيـن ايديـك
وهي دلوعه اعتـادت علـى كثـرة مداعبْتـي


فداعبها شوي شـوي حتـى تشتهـي طاريـك
وشاغبها إلين تقـول لـك: بطّـل مشاغبْتـي


واذا هي مالها خلقك..ولا تضحك ولا تسلّيـك
تحمّلها وإسألهـا: يـا عمـري ليـه عصّبْتـي


وبالك اسمع انّك يوم تضربها وهـي تشكيـك
ما يحتاج اورّي لك بفـن الضـرب موهبْتـي


صحيح انك بتملكها ومعـك الصـك بالتمليـك
وانا عارف حدود الله ومـن حقـك معاقبْتـي


ولكن قلّها المجنـون وصّانـي وهـو يعنيـك
يقول انّـه بينتظـرك ولـو شيّـب وشيّبْتـي


وانا مجنونها اللي ما نساها وانت مـا يمديـك
تغطّي ذكرياتي في هواها.. وربْـع تجربْتـي


أحس اني تماديت بكلامي.. والغضب حاديـك
ولو انّك في مكاني ما تفكّـر فـي محاسبْتـي


كفاك اني تركت الليله اشغالي عشـان اجيـك
دخلت القاعه برجلي ولا ادري ويش عاقبْتـي


وانا ما جيت اخرّب عرسك الليلـه ولا أذّيـك
أنا جيتك عشان اخاطبـك واسمـع مخاطبْتـي


توصّى..وانتبه..واحرص عليهـا والله يهنّيـك
ترى كل الكلام اللي طلَع من ضيقـيَ وكبْتـي


ولكن ما قدرت انّي أقوله وانـت مـا يخفيـك
أخاف انّـي إذا قلتـه تقـوم وتقطـع رْقبْتـي


و سلامتكم




أمانه وش بيكون موقف الزوووج :d

[ام العصافير]

والله انتي اللي جبتي العيد بذالقصيده خخخخخ

< تمزح

اتوقع انه كتب القصيده من غير مايرسلها للزوج

بس فعلا كلمات قويه وحلوه

لاهنتي على الاختيار

[فرااااج]

صح السانش اختي هــــــيا والسان قايلها

الصراحه الموقف محرج واعتقد القصيده خياليه
لو هو صادق يحبها مايحرجها قدام زوجها في ليلة عرسها !!المفروض يتمنى لها السعاده
مع زوجها ويبعد عن حياتهم ,...


(هذي وجهت نظري الخاصه فيني انا,,,,على شان مااجيب العيد,,,,مثله)


تقبلي مروري

[ام العصافير]

بالعكس صراحه يعجبني اللي يحب يسوي كذا واعبر

مهب يتمنالها السعاده ويبتعد

امحق حب ان كانه كذا

وارجع واقول مره ثانيه صح لسانه

[أهون عليك..!!]

صح لسانه وصح اختياركـ.,

أبيات جميلة ورائعة


بس انا اشهد انه جاب العيد بقووه.,


لك ودي

:

[فرااااج]

تحياتي واحترامي اختي ام العصافير -انا اعارض بشده -خلاص البنت جاها نصيبها وتزوجت وصارت على ذمه رجال ثاني ليش ..يدش بينهم ويخرب حياتهم ..ولا يبيه يطلقها على شان يتزوجها

(تدرين اختنا (هيا )جابت لنا هذي القصه والقصيده .الظاهر على شان انتهاوش في المنتدى بين مؤيد ومعارض!!بس اختلاف الراي لا يفسد للود قضيه)


وكل الشكر للاخت هيا والاخت ام العصافير


تقبلوا مروري

[ابوفيـ العجمي ـصل]

صح لسان قايلها ولاهنتي

[الـ ـشـ ـقـ ـا ويـ ـه]

صح اختيارش ياهيا ولاهنتي


تقبلي مروري

[هــــــيا]

المشاركة الأصلية كتبت بواسطة ام العصافير

والله انتي اللي جبتي العيد بذالقصيده خخخخخ

< تمزح

اتوقع انه كتب القصيده من غير مايرسلها للزوج

بس فعلا كلمات قويه وحلوه

لاهنتي على الاختيار

يعطيج العااافيه اختي ام العصافير

وربي يخلي لج كتاكيتج

لاهنتي حبيبتي


:

[هــــــيا]

المشاركة الأصلية كتبت بواسطة فرااااج

صح السانش اختي هــــــيا والسان قايلها

الصراحه الموقف محرج واعتقد القصيده خياليه
لو هو صادق يحبها مايحرجها قدام زوجها في ليلة عرسها !!المفروض يتمنى لها السعاده
مع زوجها ويبعد عن حياتهم ,...


(هذي وجهت نظري الخاصه فيني انا,,,,على شان مااجيب العيد,,,,مثله)


تقبلي مروري

عدل كلااامك اخوي فراااج

وتسلم على الطله الحلوووه

لاهنت ياخوي


: