الـسـلام عـلـيـكـم ورحـمـة الله وبـركاتـه
هذي قصيدة الشاعر كديميس العتيبي رد على الشاعر معجب المطيري...القصيده تحكي ماحوته قصيدة معجب المطيري..
نـبـي نـحـول للمـحـول حـوالـه = وعـدة نقـاطٍ تحتهـا عـدة حــروف
مـادام حطـوا للمراسـيـل صـالـه = أجبـت دعوتهـم لجـل عـدة ظـروف
وقصـدي ومطلوبـي تسـود العدالـه = وكـلٍ بدنيانـا لـه اهـداف وشفـوف
وليـا انفتـح بـاب القصيـد ومجالـه = لابـد مانسمـع معانـيـه ونـشـوف
امـا ادخـل الصالـه وكـلٍ وفـالـه= ولا اتعـدى يـم الاقصيـن واطــوف
الرجـل تعـرف قـدرتـه واحتمـالـه= لا صارفي الميـدان طايـف ومطيـوف
وصلت لنا مـن عنـد معجـب رسالـه =من محتواها عنصر الصـدق محـذوف
الله يجنبـنـا طـريــق الـضـلالـه= اليـا جـرف تيارهـا كـل ملـقـوف
ملقـوف ينـشـر ماتخـيـل ابـالـه= وعلى الهزيل من الحكي تقـل مدفـوف
الـيـا راوده شيطانـهـا واستمـالـه= روح على طق العصا يضـرب دفـوف
رسالتـه عبـر بهـا عــن خيـالـه = بدون اساس وسطحها غيـر مسقـوف
فيـهـا كــلام يفتـقـر للجـزالـه= تمجه اسمـاع العـرب غيـر مالـوف
جمّـع مـن الحكـي المزيـف هزالـه= حيث ان الـه عنـده ملفـات ورفـوف
واصبـح لجمـاع الـدوادي زمـالـه= وركب قعـودٍ يلحـق القـوم مـردوف
وليـا حثـل مانـي براعـي حثـالـه =بملـوث الأقـوال مـانـي بمكـلـوف
لـي منهـجٍ نجـس النبـا ماينـالـه =عالي على الهابط على راس شفشـوف
ويمـدح مطيـر ويدعـي فـي مقالـه= مجد ٍلمطرانـه علـى مطيـر موقـوف
وده يماريـنـا وذا مــن هـبـالـه =الفرق واضح عنـد الأمـه ومعـروف
يـدرون عـن قـوم الحيـل والحبالـه= اللـي مخططهـم مشاهـد ومكشـوف
اللي ليا ركـب الرشـا فـي المحالـه= يطلع سهمهم بعـد الأحـداث مشلـوف
ويدرون عـن قـوم الوفـا والجمالـه= للجـار واللـي مستجيريـن واظيـوف
اللي لهـم فـي نجـد قالـه واصالـه= وعن مستوى بعض القبايل بهـم نـوف
حنـا عتيبـه فـي الأمـور الجـلالـه= عوق الخصيـم مزبنـة كـل ملهـوف
حصن ٍ حصين يزبّـن اللـي لجـا لـه= بيوتـنـا للملتـجـي درع وكـهـوف
ينـزل ضعنـا مــا نـقـدم نـزالـه= لو كـان بأفـواج الحفيفيـن محفـوف
وليـا عـوا ذيـب ٍ لذيـب وعـوا لـه= ومن كل صوب ٍ في الوطن هب عاصوف
ليـا هاجـت الامـواج فينـا ثقـالـه= لو هاجمونا القوم طـوف ٍ ورا طـوف
ليامن سـوق الحـرب سيقـت جمالـه= سقنـا جملنـا بيـن ميـات والــوف
وليا مشى جمع ٍ لجمـع ومشـى لـه =رماحنا في المعركـه تاصـل الجـوف
صديـق عينـك مانجـي فـي حيالـه =ليا جاء نهارٍ فيه قاصـف ومقصـوف
وليـا تمـادى المدعـي فـي جـدالـه =عندي عن الماضـي ملفـات وكشـوف
مصـادر التاريـخ عـيـن الـدلالـه=لمن كان عنده سمع وعيـون ٍ تشـوف
منـاخ عرجـا قـد حصدتـوا وبـالـه=مسجلـه نتايجـه وسـط مـظـروف
فيصـل بجـو مغيـب نـزل رحـالـه=وارسل سبوره تبـرح الـدار وتحـوف
وغابـوا عنـه مقـدار يـومٍ ولالــه=وجابوا له الأخبار بالسمـع والشـوف
وقالـو لـه العتبـان بـأرض ٍ زلالـه=أرض ٍ فيـاح ٍ بـس عبلـه وقفقـوف
وبواد الرشا واللـي جنـوب وشمالـه=ومعهم من الحافـر كراديـس ٍ وقـوف
وعلق علـى جمـع الحـروب اتكالـه=وابن العويرى وصّف الشيـخ شاحـوف
بالمـدح فـي الألقـاب حطـه وشالـه=حتى غدا ريش اشقر الريـش منتـوف
وبعـد المواجـه بالفشـق واشتغالـه=ضاعت وصوف اللي على الحر موصوف
وقفـا عـن الديـره سريـع ارتحالـه=وترك على الساقه مساكيـن وضعـوف
وكـل ٍ بلـش عنـد التوالـي بحـالـه=وتخيـروا ماقـال مزيـد لمقـطـوف
ودا ورد جعل الوبـل يسقـي ا سهالـه=حيث الثلاثه جمعـوا بأرضـه صفـوف
وتحالفـوا ضــد العتيـبـي لحـالـه=ناويـن ينفونـه مـن الـدار بالكـوف
وعقـب المواجـه بانـت الإستحـالـه=وتمزع الجمع الـذي كـان مصفـوف
عقب استمـر الحـرب وابطـت ليالـه=واحد ثبت واثنين خفـوا مـن الخـوف
راحـت فهـود مطيـر مثـل الثعالـه=والحر منهـم قدمنـا صـار خاطـوف
ولجـى الأميـر لحيلـتـه واحتيـالـه=وسرى بتالي الليـل ماهـوب مشيـوف
شـب الشعـار ونـار فـوق الخيالـه=وخان الحليف اللي فعل فيـه معـروف
ربـط كلابـه ثــم تقـفـى حـلالـه=وسلك طريق ٍ قبـل مسـراه معيـوف
وقـع ولـد باقـان صــك الإزالــه=واصبح ذراعه عـن هقاويـه مكفـوف
وحـرب الرشاويـه وكيـف اجتوالـه=منـاخ لا غـارات خاطـف ومخطـوف
عشريـن يــوم ٍ مستـمـر ٍقتـالـه=وهذا يجيـب الملـح والثانـي يـدوف
حنـا هـل المنهـل وحاميـن جـالـه=محـد ٍ يجيـه الا بمـنـه ومـعـروف
وجانا دويـش مطيـر فيـه استطالـه=ومن حرب وافواج القحاطيـن مكنـوف
طمعـان فـي واد الرشـا واحتـلالـه=لكـن واجـه خيـل ورجـال وسيـوف
ولابـرّق الا عقـب شاهـد رجـالـه=البعـض مقتوليـن والبعـض مكتـوف
وبـدل دويـش مطيـر حالـه بحالـه=وصار الصعب عقب المناويخ معسـوف
وعقب العواجـه صـار فيـه اعتدالـه=ورمح الطراد اللي معه صـار معكـوف
حبالنـا طـالـت وقـصـرت حبـالـه=وفارق قرارت نجـد بالكـوف بالكـوف
كـم فـارس ٍ منكـم سريـع انفعالـه=لاياشاف دقلات الرمك تقـل مشعـوف
انشد عنـه ذيـب جبلـه ويـن شالـه=ومـن قلطـه للذيـب بدمـاه ملحـوف
كـم مـرة ٍ صـاروا شيوخـك فوالـه=لسيوفنا فـوق النضـى وام سرجـوف
وسلطـان اخذنـا عبدتـه مـع دلالـه=اللـي ملبسهـا مـجـزع ونفـنـوف
وخذنـا كحيليـن عريـضـن ظـلالـه=بيت الأمير اللـي كمـا رجـم ذايـوف
فوق البعير اللـي مـن اطيـب جمالـه=وتسعين فارس باحدب السيف مجعـوف
فـوق العوينـد جعـل تسقـى تلالـه=عد الجهام اللي من الصيـف مصيـوف
وفنـدي ذكـر ماصـار بعـد احتفالـه=بعيد انتصار جموعنـا وارسـل زروف
يـم الذويبـي فـوق نضـو نعنـا لـه=خبر من الشاعر اليا الشيـخ مزفـوف
حيثه رفض دعوة دويـش ٍ شكـى لـه=مكتوب ابن وطبـان يضربـه الطـوف
امـا منـاخ الضـال يالـك ويـا لـه=مصـوره مخلـد وسهـاج بـوصـوف
تـقـول صــوّره المصـوربـلالـه=يوم الجثـث ماغيـر الأبـدان وكتـوف
حصلكـم هــاك النـهـار انجـدالـه=يوم الرصاص مـن البواريـد مقـذوف
رحتـوا كمـا صيـد ٍتزايـد اجفـالـه=وخليتوا اللـي كنهـن شـرد خشـوف
امسـت عطفكـم عنـدنـا بالكفـالـه=ولاحد ٍ كشف عنهن غطىٍ كان ملفـوف
ندري ان مـن يكسـب سبيـه حلالـه=لكـن شيمـه واحتـرام ٍ ومـعـروف
وطـلال صـاب مطيـر فيـه انخذالـه=عقب سمك عج الرمـك كنـه قنـوف
غادرتـوا الميـدان عقـب اشتعـالـه=واصبح عليكم معطف الخوف معطـوف
محـد ٍ يلـد لصـوت عمـه وخـالـه=نسيتـوا النجـده ومسعـف ومسعـوف
وحـرب الحـوّر نايـف تكبـد نكالـه=وبريه عقبـه بدرهـا صـار مكسـوف
عقب المناخ اللي ربح مـن سعـى لـه=وخسر المقيم وغـادر الـدار منـدوف
احـد ٍ حـدر سمحـان ينقـل عيـالـه=واحد ٍ حديناهـم علـى راس شنظـوف
وعقبـه نزلتـوا رس مـدري ثمـالـه=دايم بمغـرف يابـس الكبـد مغـروف
وعلـوا عطونـا محضـر الإستقـالـه=ومحضر بني واصل مصدق ومضيـوف
وهفـوا مثـل نـوّن تمـزع خيـالـه=وكاس المذله بينهـم صـار منصـوف
فالحرب حنا هل الصبـر فـي الإطالـه=نلطم ونـوف وبعدهـا نطعـن دفـوف
لكـن مـن تغلـب عليـه الجهـالـه=يقول ابحـذف كلمـة ٍ يمكـن تطـوف
اليا قـال شيطانـه قـل العلـم قالـه=وحطه ورا بعض العرب يلقـط قطـوف
ولو قـال مهمـا قـال مانـي بحالـه=تبقى الكوايا لو نبـت فوقهـا الصـوف
مخلف هـزم خمسيـن فـارس لحالـه=وجاب الأصايل عقـب وراهـم الحـوف
لـو شفـت حمـران النواظـر قبالـه=الكـل منهـم للمنـع يرفـع كـفـوف
وقبـر الصييفـي لـه عليكـم جمالـه=يوم الرصاص يلـوف طابوركـم لـوف
ضحوا لمنقذكم مـن اهـل الشكـا لـه=لجله عفـوا عنكـم وقالـوا بهذلـوف
وقصيرنـا منكـم ليـا جـاء زوالــه=وصار السبب منا تهيـت لـه صـدوف
مـن ربعنـا نذبـح ثـلاثـه بـدالـه=ونرعى عيالـه بالحمايـه ومصـروف
وخوينـا لـو بـار نـرفـا خمـالـه=مايلحقـه منـا تخالـيـف وحـفـوف
وقصيركـم منـا جـرا لـه جـرالـه=امسى ولا اصبح صار للجـار صـادوف
امسـى معافـا فـي عيالـه ومـالـه=واصبح عليه مصلفح اللبـن مرصـوف
وخويكـم يامطـيـر تــم اغتيـالـه=من عقب عشاكم عشى ٍغيـر مخلـوف
والضيـف ماسـر التـنـاول نـوالـه=ذكي ذكاه وملحة مطيـر فـي الجـوف
احـد ٍ ذبحتـوا عمـد واحـد ٍ ختالـه=واحد ٍ حذف للذيب وثنيـن بـل جـوف
وذا منتهـى واقصـى حـدود النـذالـه=لكـن فـي مفهومكـم مابهـا حـوف
مـن مـات يكتـب للخليفـه وكـالـه=يورثه عـرف ٍ عـن الحـق محـروف
من العِشـر حتـى المنتهـى بالكلالـه=كل ٍ من الترثـه لبـس ثـوب مقلـوف
هـذا الجـواب لجانـب ٍ مـن سؤالـه=وعلى اليسار اللي بقى منـه منسـوف
مايستويلـي منهجـه واستـوى لــه=لوكـان مليـان ٍ دغاليـب وجـلـوف
18-12-2007, 08:54 PM
رد نااار من الشاعر كديميس العصيمي
العرض العادي
