الانسكاب !!

[شرس]

اهدي لكم قصيده تحمل فيها المعاني الجميله والراقيه

واتمنى ان تنال على اعجابكم

بري حالي لا انتهى العصر واعلن الإنسحاب =وخلت الشمس الصداره ومالت للغروب

واذن المغرب وساد الفضا مثل الضباب =وانتهى والليل لبس الأماكن لبس ثوب

وردت همومي على قلبي الصلب الخراب =وردت حيام الضوامي على عد جذوب

كلها هانت ولا هنت يا هم الغياب =من محبة صاحبك صرت يا هم محبوب

اخذ ليلك بأوله واكل واشرب في رحاب =قلب من شدة طهارته تجفاه الذنوب

إيه والدنيا مساكن ورحله واغتراب =والغلا بالوقت هذا مميز بالعيوب

اشمل بجسمي واعدي على رؤوس الهضاب =وكلما ضيعت وجهي دريت انه جنوب

ويش اسوي فيك يا عم تلعات الرقاب =وانت واقع والتمعان في عيونك هروب

انت مجرم حب لا.. ! ويش جاب لجاب =انت عذب ٍ عذب رجيلي بشوك الدروب

صرت اهاب من التزاحم وانا ماكنت اهاب =وامشي بكيفك لو اني على المشي مغصوب

صرت اجمع من جروحك وكلماتك عتاب =وقبل اقول وشفيك تجرحني استغفر واتوب

صرت احسب لناس ما كنت احسب لها حساب =وصرت اكذب لأجل ترضى وانا ماني كذوب

شوف مهما صار بي انحنائي انتصاب =العب بعمري وبعثره بيدك ياللعوب

ادري ان الجاذبيه تسبب الإنسكاب =وادري اني منسكب وادري ان يديك كوب

سلت فأرضك وارتوت بي وفاضت بي عذاب =لين حبتني قلوب وتعادت لي قلوب

فإعرف ان زولي غدير وحكاياهم سراب =والمقادير الأيادي وشين الحظ طوب

يعني ليا من رموني حقيرين الجناب =صار زولي عشرة ازوال وعيوني قروب

اتعدد لأجل اداريك عن طيش الشباب =وأتوحد لين يطغى على وجهي شحوب

ماني استاهل كذا منك يا وبل السحاب =لا تبللني وانا ودي انك ماء شروب

ايتني وادخل فـ قلبي يا قلبي باب باب =واخطر عروقي برجليك ياأسمر دوب دوب

جل من ولع عروقي بقنينة تراب =نوب تضحك من عذابي وتبكي منه نوب

لو لي دعوه وحيده وهي بتستجاب =قلت يا ربي ليا مر خالفه الهبوب

زوي قلبي كل ما ازويت خصرك بإنسياب =و وقف العالم يرد البحر من كل صوب

يا خلاصة شهد وعذوق ما لذ و طاب =يا مغلبني وانا ما بعد صرت مغلوب

يا مسفرني لوجهك ذهاب بلا إياب =يا معزز بالغلا يا مقدر يا محسوب

ايتني واذهب بي بعيد يامال الذهاب =ضمني بإيديك بجمد على صدرك واروب

انت لو ضميت تمثال من ضمتك ذاب =كيف لو ضميت صدر ٍ على ذكرك يذوب !

لـــــ سعد علوش

[الملك]

صح لسان ابن علوش
ولاهنت فديتك على النقل
تحياتي

[الاحرش]

صح لسان ابن علوش
ولاهنت

اخوي شرس على النقل

[شرس]

المشاركة الأصلية كتبت بواسطة الإعصار

صح لسان ابن علوش
ولاهنت فديتك على النقل
تحياتي

الاعصار

يامرحبا ومسهلاا

وفديتك على الحضور الرائع

وتقبل اعذب واجزل تحيه

[هــــــــــادي]

شهادتي فيه مجروحه المرعب

لاهنت يالشرس على النقل الموفق


احترااااامي

[ابن الصحراء]

شرس
لاهنت على النقل الجميل

وصح السان ابن علوش
قصيده رائعه

ولك كل التقدير والشكر

[فلاح بن ملبز]

السلام عليكم ورحمة الله وبركاته

أخي الكريم / شرس

صح لسانك ولسان شاعرها / سعد بن علوش

ويعطيك العافية على هالنقل الرائع

ولك جزيل الشكر

[راعية الابل]

صرت اهاب من التزاحم وانا ماكنـت اهـاب=وامشي بكيفك لو اني على المشي مغصـوب

صرت اجمع من جروحك وكلماتـك عتـاب=وقبل اقول وشفيك تجرحني استغفـر واتـوب

صرت احسب لناس ما كنت احسب لها حساب=وصرت اكذب لأجل ترضى وانا ماني كذوب

شرس >>ياشين الحب لاااسيطر على الشخص

تسلم على النقل ويعطيكـ العافيه

[شرس]

المشاركة الأصلية كتبت بواسطة الاحرش

صح لسان ابن علوش
ولاهنت

اخوي شرس على النقل

يامرحبا ومسهلاا

ولا انت

وحضورك اسعدني

ولك كل الشكر والتقدير

[شرس]

المشاركة الأصلية كتبت بواسطة هــــــــــادي

شهادتي فيه مجروحه المرعب

لاهنت يالشرس على النقل الموفق


احترااااامي

هادي

يامرحبا ومسهلاا
ولاهنت على المرور الرائع

ولك كل الشكر والتقدير