الكتابة في المنتدى بالنسبة لي امر اقل من الثانوي لاني لايوجد لدي اي طموح منتداوي..فاذا شفت نفسي فاضي جدآ جدآ..اتسلى بمشاكسة اعدائي اولا لانهم لايرقون لمرتبة المحاربة..وايضآ امسي بالخير على حلفائي الذين لا اعرفهم الا في الشبكة العنكبوتية..وايضآ انا بطيء جدآ في الطباعة فمنها احاول اني اصير سريع لاني اكتشفت ان الماسنجر اختراع للاطفال والمراهقين والبنات الجياكر جدآ جدآ..(جيكر كلمة كويتية معناها قبيح الوجة).
فيه شي لفت انتباهي من مدة..الا وهو ان منتدى القلم الحر لايوجد فيه مواضيع مثبتة..هذا يفهم منه ان الاخوان المشرفين مافيه شي عاجبهم من المواضيع..مع انني ارى ان فيه مواضيع تستحق التثبيت..مثل مواضيعي فجميعها تستحق التثبيت(مغرور)..لا هذي دعابة مني وانا ذكرت في موضوع قديم ان مشاركاتي فوق مستوى القراء(رفعت ضغطك)..وهذي بعددعابة مني..لكن والله فيه مواضيع تستحق التثبيت..مثل موضوع السحابة الممطرة (دوروه).
النفاق وما ادراك ما النفاق..تصدقون ان نسبة النفاق هالشهر زادت عن حدودها الطبيعية..والسبب بوعيدة من قناة سكوب..والله اني ما اطوف اي حلقة له لانه رجل كوميدي من الطراز الاول..واكثر شي ضحكني يوم امن الدولة حجزوا المذيع الهاجري..وكان فيه اتصالات على برنامج بوعيدة ويحاول انه يبكي من التأثر والمخرج يقرب الكامرة من عيونه ولا طلع معاه شي لانه نصاب..وانا حزتها عيوني دمعت من الضحك.
قبل اسبوعين كنا مجموعة من شباب القبيلة..واحد يحمل شهادة الدكتوراة(تخصصه علمي بحت) وكان مسكين ما يعرف يجمع افكارة اذا بيتكلم بالسياسة..والثاني شهادته ثانوية وموظف باحدى الشركات النفطية وبداخل مخة بيب من حديد وخالطه بفولاذ والمصيبة انه يدعي انه يفهم بكل شي..والرابع احد شباب القبيلة اللي يطمح ان صورته تطلع صفحة كاملة بمجلةالمختلف..والخامس مدرس شريعة ودائمآ مبتسم وعنده مخزون ثقافي كبير لكنه يحب مقاعد المتفرجين لانهم بحسب قوله ياكلون حب على راحتهم..فقلت عن احد شباب القبيلة المرشحين لمجلس الامة انه مايعرف يتكلم ويحاول يقلد احمد السعدون حتى بنبرة صوته..وافكارة مشتته..وانه شوي مندفع(خفيف)..وقبل ان اكمل كلامي هاجمني الجميع وكأني سبيت المرشح..فقلت ياجماعة عضومجلس الامة مومطلوب منه انه يكون خطيب ولكن المطلوب منه انه يكون امين..وهذا العشم بمرشحنا.
اسمعوا حكمة الشيبان..كنت اسمع كثيرآ من احد الشيبان يقول لولده لايصير طموحك طموح ثعل خلك بطموح الذيب(الشايب من اهل الجنوب واكيد يقصد بطموح الذيب الكسب)..المهم اني سألته وش طموح الثعل..قال الجخيخة يمسكها الثعل بثمه ولا نشدوه وش صدت قال جخيخة ثم طارت من ثمه يوم تكلم..بصراحة اعجبتني القصة..بس ذا الجخيخة وش اللي خلى الثعل يصيدها؟؟اعتقد الشطار بس هم اللي فاهمين.
فيه موضه صايره بالمنتدى..وهي مواضيع الوداع التي تبللها دموع ابوعيدة..انا اشوف انها اسلوب مكشوف من خلاله يبي العضو يطلع بشي لانه خلص بانزينه..يا اخوان اللي بيودع الله يحفظه..وعندي نصيحة وهي عبارة عن بيت شعر يقول:
ان كنت ذا رأي فكن ذو عزيمة______فإن فساد الراي ان تترددا
وفيه شي اسهل من كتابة موضوع طويل وهو انك تسكر الجهاز وتريح بالك..وهذا اللي سيتم الان.
الى اللقاء.
24-04-2009, 06:03 AM
)))
العرض المتطور
