السلام عليكم ورحمة الله وبركاته
(( يقولون رواة السوالف ان فيه واحد رشيدي ( مستور الحال) وانه يرغب ابنت عمه ولا عنده شيء . وعمه يريد ان يزوجها واحد ثري عنده مال لان ابن اخيه فقير. وقام انت يالعم نادى ابناخيه وقال له يافلان انا ودي ازوج بنتي اذا كان احضرتلي عشر من البل وذلول فانا زوجتك واذا ماحضرتلي فاسمحلي ازوج بنتي قال الولد ابشر ياعمي .
اصبح الصباح وقام الولد واخذ بندقه وتوكل على الله ولايدري وين يروح الا ان امله في الله سبحانه وتعالى كبير .
اخذله قرابة يومين لاأكل ولاشرب ينحي ويسند حتى جاء في ذاك المفلى والا ان فيه ابل وراعيتها بنت واقبل عليها وسلم وقال لها :
يابنت يلـي تسمعيـن الكلامـي= ماتصبحين اللي قطع بطنه الجوع
قامت البنت وحلبت احدى النياق حتى ملت الطاسـه :
وقـــــــــــالــــــــــــت :
هاك اللبن وانت عليك السلامـي = ان كان مالك عندنا غير مطموع
شـرب الولـد مـن اللبـن ليـن اكتفـى وقــال :
يابنت؟ يابنت الرجـال الكرامـي = انتي من ايا الناس والجود متبوع
قــــــــــــالــــــــــــت :
انا من اللي جدهم مـا يضامـي = ربعي مطوعت الاعادي لهم طوع
قـــــــــــــــــــــــــال :
ماذم ربعك؟ من رجال الكرامـي = لكن دليني على بيـت شعشـوع
معناها يقول انا ماذم ربعك لكن دليني على بيت كريم .
قــــــــــــالــــــــــــت :
انصا الفريق الى بهاك العدامـي = وانشد يدلونك على بيت جربـوع
جربوع ابوها .
مشى الولد من عندها وراح ينشد وحتى وصل البيت وقلط من عرض الضيوف ومن بعد ماتعشوا الضيوف شافت البنت الولد ؟ وقامت البنت واستظهرت ابوها وقالت له يابوي هذا الولد جاني اليوم في المفلا وقال كذا وكذا وروت جميع الابيات والظاهر انه يابوي محتاج واعطه والله يكرمك .
وقام انت ياجربوع وقال تعال ياولدي وش عندك علمني بامرك وقال الولد والله ياطويل العمر ماعندي مشكله ولاشيء؟ ولكن انا طلبت ابنت عمي وقال عمي احضر لي عشر من البل وذلول وانا ماعندي شيء وقمت اترزق الله؟
اصبح الصباح قام جربوع وقال له اخترواعزل عشرمن البل وذلول واركب على احسن مطيه وروح لعمك اذا اخذها منك وزوجك ؟ تعال واخذا زوجتك واسكن جنبي هنا ، واذا زوجك وردها عليك فاسكن مع عمك .
قام الرشيدي واخذ البل وركب مثل ماوصاه جربوع وجا عند عمه وقال يالله ياعمي انا جبت طلبك .
قاله انت يالعم من وين جايبها انت سارقها من اهلها ؟ والا من وين؟ علمني ؟ قال له اعطانياها الله من كريم .
قام العم واستحى من ابناخيه وزوجه بنته ورد البل عليه .
وقام الرشيدي يقصد ويمدح في جربوع ويثني عليه ويقول :
مانت بجربوع انت نمـر تنمـر = نمر وظاهر من شيـوخ انمـاره
نمر ظهر بالطيب من روس شمر = شمر اهل التكميل واهل الوقـاره
شيخ اليا منـه يطلـب ماتعـذر = يعطي العطايا ماحسب للخسـاره
راعي دلال وسط نـاره مزبـر = يفرح بها اللي نازح من ديـاره
اعطاني البل يوم عمـي تعسـر = عسى المطر دايم يسقي اديـاره
وسلامتكم
منقوووووووول
26-11-2004, 05:08 PM
.
العرض المتطور
