قصيدة من نوع التمني امل ان تحوز على رضاكم
ياليت رصيدي واحد وسته اصفـار=علىاليميـن ولايكونـن شمـالـي
يكفينـي المليـون ماريـد مليـار=لاصار رزقا مـن مصـادر حلالـي
مابيـه باليـن اليابـانـي ودولار=ابيه فـي عملـت بـلادي ريالـي
ابي اشتريلي جيب من نوع فكس ار=ادفع القيمه كاش لو كـان غالـي
مديل الفين وسبع بالوصف ماصار=حطو بـه اليابـان شيـن خيالـي
مضمون بالتصنيع مسمار مسمـار=مشيك عليـه مهندسـه بالكمالـي
يصلح مع الصحرا ويصلح مع القار=ويضا مصمـم للوعـر والرمالـي
جديد ماعمره ضرب كـل مشـوار=مركوب لصحاب السمو والمعالـي
والله لـو صناعتـه ماهـم كفـار=لدعو لهـم بوقـات كـل ابتهالـي
ابيـه لامنـي تنصيـت الاقـفـار=امشي مع البـران مرتـاح بالـي
معي ثلاثـه كلهـم نقـو وخيـار=الكل منهـم مـن خيـار الرجالـي
واحد من اهل الدين وثنيـن شعـار=ربعـن عليهـم بالـزوم اتكـالـي
اللي سوافهـم لياصـرت محتـار=تودع ضميرك دايم الـدوم سالـي
ماسولفو عن المسلسـل والاخبـار=ولاشجعـو لنصـر ولا الهـلالـي
مافيـه متكبـر ولافيـه ثـرثـار=ولافيهم اللـي هرجتـه بالجدالـي
لاصار في روضن ومشبوبه النـار=على غديرن مـاه صافـي زلالـي
في خايعن متخالفن فيـه الازهـار=بس ام سالم صوتهـا بـه يلالـي
نبعد عن الديره وعن بـث الاقمـار=عن عالمن تشوف فيهـا الهوالـي
هذا ربيع القلـب لاصـار ماصـار=ولا العمـر لابدلـه مـن زوالـي
الشاعر عبدالله الجرهدي
14-12-2007, 10:54 PM
العرض المتطور
