معاناة فتاة ...

[العبرةالحائـرة]

تمنيت من فترة طويله اطرح لكم هالقصه وكل ما ابي اكتب اتردد واقول في داخلي اني ما لي حق اني
اتكلم بالموضوع هذا لأن هالقصه مو لي ، بس انا حيل متضايقه واتمنى منكم تساعدوني واللي بقوله
لكم اقسم بالله انه صحيح ميه بالميه وما زودت شي من عندي وأدري انه الاغلبيه منكم ما راح يصدقون ولو انا في مكانهم بعد ما صدقت ، بس هذا الصج وهذي الدنيا ،،،، أول شي أنا ابي اتفق معاكم أن القصه هذي راح اسويها لكم على حلقات عشان الكل يقراهااا لان لاحظت ان الاغلبية ما يقرون المشاركات الطويلة ...المهم ما أبي اطول عليكم وابي اقول القصه ...

الحلقة الاولي ..

كان عمري تقريبا تسع سنين تقريبا وكنا مثل أي ناس عندنا جيران وفي يوم من الايام الجيران اللي

جنب بيتنا غيرو بيتهم ( شالو من منطقتنا ) المهم وراحو حق منطقه ثانيه وتم البيت فاضي لمده

معينه وبعد فتره جااو ناس وسكنوا بهالبيت كانت مرأه عجوز ومعاها بنت أصغر مني بسنه يعني كان

عمرها ثمان سنوات المهم راحت امي حق هالجاره ورحبت فيها بمنطقتنا وانا تعرفت على هالبنت

وصارت علاقتنا معاهم علاقه قويه حييييل في يوم سألت البنت اللي هي بنت جارتنا وقلت لها وين

أبوج قالت أبوي ميت ( متوفي ) قلت لها عادي ابوي اهو ابوج أي شي تبينه ابوي يجيبه لج وقالت

حتى امي انا اصلا ميته قلت لها شلون وهذي المرأة قالت هذي جدتي وبعدين اخذنا اللعب ولعبنا ونسينا

الموضوع هذي اول مره سألت فيها البنت فلما رديت بيتنا قلت حق امي يمه فلانه ما عندها ابو ولا ام

تقول انهم ميتين قالت امي أي صح كلامها الله يرحمهم ومن هالقصه بعد صارت علاقتنا معاهم اكبر

واكبر وصارت البنت تجي بيتنا تقريبا من الضحى وتقعد في بيتنا وتروح بالليل عند جدتها وجدتها بين

فترة وفترة تسأل عنها وكانت جدتها كله تصلي وتقرأ قران وكنا كل ما نروح بيتهم نجيب لعبه ولا حلاو

كانت لمن نطق الباب نسمعها تقول الله واكبر يعني تبين لنا انها تصلي المهم كبرنا وصار عمري تقريبا

خمسة عشر سنه والبنت اربعة عشر سنه وكان في بعض الاحيان انا اروح في بيتهم وفي مره من

المرات وانا في بيتهم جات وحده من وزاره وكانت تكلم الجده وتقول لها وين غرفة البنت فاطلعنا انا

والبنت هذي ورحنا قعدنا بالصاله وقلت هذي شتبي بغرفتج قالت مادري عنها ، ولما رديت البيت قعدت

افكر بهالمراه وكلامها وانها جايه تشوف غرفت رفيجتي قلت هذي ليش جايه تشوف الغرفه وكانت

تكتب بكتاب معاها فارحت وقلت حق امي يمه مو فلانه امها وابوها ميتين وما عندها الا هالجده

وعندهم اهل بس مو هني بالكويت عندهم اهل بالسعوديه قالت امي أي صح امها وابوها ماتو في حادث

لما كانو رايحين السعوديه ادعمتهم شاحنه وبس هالبنت اللي عاشت وعطوها حق جدتها عشان

تربيها قلت لها ادري بالسالفه هذي بس اليوم جات وحده وقالت كذا وكذا فقالت امي انتي مالج شغل

فقلت اكيد في شي المهم مرت الايام وبعد فتره عرفت انه هالبنت مو بنت هالمراه العجوز ...

والى للقاء مع الحلقة القادمة ...

[هند]

ياهلا بالمهاجرة
عزيزتى هالقصة هل هي حقيقية وهل حدثت معكى أنتى


ننتظر التتمة
لاتبطين علينا



السؤدد

[العبرةالحائـرة]

هلابج اختى السؤدد ... القصة حقيقية ...

واحداثها كلها صحيحه ومثل ما انا ذاكره....

[هند]

تسلمين يالغالية على التوضيح

تراني انتظر البقية


لك مودتي
السؤدد

[الخريف]

اختي العزيزه المهاجره

انا مصدق من الحين

بس ترى مالها داعي التعليقه وين باقي القصه

والله اني متحمس على الباقي من القصه

بس انشاء الله انها خير ماتطلع في الاخير القصه ما ساويه

ويعطيش العافيه يالمهاجره

ولاتتاخرين علينا في التكمله انا في الانتظار

ولاهنتي

[سعد الصميل]

بإنتظار الجزء القادم
شكرا المهاجره

[العبرةالحائـرة]

الحلقة الثانيـــة ...

العجوز هذي اصلا ما تجيب عيال وراحت وجابت هالبنت من دار الرعايه وربتها على انها بنتها

وعطتها اسمها وكانت امي تدري بهالموضوع من اول ما سكنت العجوز وبنتها بس ما علمو احد

عشان البنت ودرت البنت بهالموضوع ، المهم البنت هذي كانت من النوع العنيد وشيطانه وزاد

عنادها وشطانتها لما عرفت بهالموضوع وصارت تكره العجوز وكله تغلط عليها وتقولها روحي

يا عبده ( العجوز كانت سمره ) وكانت العجوز تبكي وتقول لها بعد كل هالتربيه تغلطين علي

وتقولين لي هالكلام، وكانت البنت اصلا حيل مهمله بدروسها وصارت اكثر اهمال وصارت ما

تنجح الا بالغصب لما تروح العجوز حق المدرسه وتكلم المدرسات وكانت هالعجوز حيل حيل

تحبها وتخاف عليها وكانت متابعه دراستها وتحط لها مدرسات علشان تنجح وكان كل شي تبيه

كانت تلبيه لها بس البنت ما يعجبها العجب كانت طايره مع الطايرين وكانت كل ما تقولها شي

العجوز تقول لها يووووو انتي عجوزه وما تفهمين وما تعرفين شي وكانت العجوز تزعل وانا

والله كنت ازعل على العجوز لانها كانت حيييييل حبوبه وما عمرها ردت لها طلب المهم جات

فتره والبنت هذي تعرفت على بنات بالمدرسه وهالبنات من النوع اللي الله يستر عليهم والبنت

هذي طبعا تبي تصير مثلهم على قولتهم فري يعني تبي تتعرف على شباب حالها من حالهم وتبي

تفتك من الحكره اللي تقول عنها ( يعني العجوز كانت حاكرتها مثل ما تقول ) المهم وكانت بعد

تروح حق بنت من بنات جيارنا وكانت هالبنت بعد تعلمها على هالسوالف البطاليه المهم البنت

هذي تعرفت على شاب وفي مره من المرات صادتها العجوز وهي قاعده تكلم هالشاب وعصبت

العجوز وصارت تصارخ عليها فالبنت انحاشت من البيت وطلعت بالشارع لأن العجوز كانت تبي

تطقها وصارت تركض بالشارع والعجوز تركض وراها فالبنت ادخلت بيتنا وجات ورى امي

وطلبت من امي تبعد جدتها عنها ، امي أخذت الجده وهدتها وقالت لها تعالي وقعدت مع الجده

وقالت الجده حق امي انه صدتها تكلم شاب وقالت حق امي خلاص انا كبرت وما اقدر اتحمل

مسئوليتها لازم ارجعها حق دار الرعايه ...

[مشغول]

اى زين تسوي فيها تردها لرعايه
هذي تتشيطن مع الشباب

[هند]

صج مافيها خير

ننتظر التتمة


السؤدد

[العبرةالحائـرة]

الحلقة الثالثة ...

المهم .. امي قنعتها انها تصبر عليها .. وهذا عمر مراهقه ... مصيرها تعقل ...

فاقتنعت العجوز بهالكلام

ومرت الايام ... والبنت ما قطعت علاقتها بالشاب ... وتعلقت حيل فيه ... في يوم من الايام

دخلت العجوز ترتب دار البنت اللي نسيت تقفلها .. المهم .. لقت العجوز جنطة تحت السرير ..

وبطلتها ولقت البنت حاطه كل اغراضها بالجنظة ... انصدمت العجوز بالجنطة واللى فيها ..

وراحت للبنت وقالت لها ليش مجمعه اغراضت بالجنطة .. قالت لها بس جذي ... ولا دورين

باغراضي مره ثانية .. ومنو سمح لج تدخلين داري المهم أنا قلت لها عيب عليج هذي امج ...

المهم صارخت البنت وقالت ماهي امي ... وما ابيها وتعالي نروح بيتكم خليها تقعد بروحها ..

ورحنا بيتنا المهم .. ارجعت البنت بيتهم .. وشوي ما نشوف الا العجوز جايه عند امي

وتبكي ... قالت لها امي اشفيج ...قالت هالبنت تبي تنحاش مع الصبي اللى قاص عليهااا .. (

كانت البنت متفقه بهالليلة تطلع مع الشاب ,,, وتنحاش من جدتها ) وما اقدر اكثر من جذي اذا

نحاشت راحت تكون المسئولية علي وآنا اطلع مو مهتمه فيهااا ... وراح ادخل مخافر وآنا

بهالعمر خلاص انا قررت اردها لدار الرعاية ... وصج اخذتها والله لا يوريكم هذاك اليوم والله

كان يوم صعب علينا كلنا العجوز جمعت اغراض البنت ودتها حق المخفر لأن دار الرعايه لما

قالت لهم قالو احنا ما نستلمها انتي روحي وديها حق المخفر واحنا ناخذها من المخفر المهم

العجوز سوت اللي قالو لها وكانت والله اذكرها هالعجوز شلون بكت عليها وكانت تبكي بحرقه

وتقول الله ياخذ اللي كانت السبب بخراب هالبنت والبنت كانت تبكي وتترجى العجوز انها تخليها

وانها ماراحت تكلم الشاب مره ثانية وكانو الجيران كلهم واقفين والكل كان يبكي عليها من

رفيجاتها والجارات المهم ودتها حق المخفر واستلموها دار الرعايه والعجوز لما ردت البيت

كانت تبكي وتدعي طول ما هي قاعده على البنات اللي خربو هالبنت والله وكلنا افتقدناها لان

هالبنت كانت حييييييل قريبه لنا وكانت مثل اخت من خواتي ويمكن اعز وما اقدر اوصف لكم

شلون صار مكانها فاضي ، وبعد فتره العجوز هذي راحت تزور البنت ما قدرت على فراقها ولما

راحت الدار ما رضو يدخلونا تخيلو ليش ؟؟؟؟؟

الى اللقاء مع الحلقة القادمة ...