اسباااااب الخيانة من الطرفين؟؟؟

[كان زمان]

السلام عليكم ورحمة الله وبركاته
بصراحه موضوع خطير وصريح
للاخت الفاضله: الجازى
وانا ايد الجازي بكل ماقالته
ومافي داعي تاخذنا العزه بالاثم ولا نخلق اعذار
انا عندي اساله في صلب الموضوع محيرتني
ايعلم الرجل الخائن انه مريض نفسي ولابد من علاجه؟؟؟؟
* ليش الشباب يخووووووووووووووون؟؟؟
*هل الزوجات السبب؟؟؟؟؟
*وهل الزوجات يخونن سواء خان الرجل ام مجرد الشك فيه تحت قاعده الجزاء من جنس العمل
*ام الفتن والشيطان .......الخ
ياريت الموضوع يتكمل من كل جوانبه لانه داء العصر
ومرض خطير ينهش الاسره

[راعية الناقة]

السلام عليكم ورحمة اللة وبركاااااااااتة

اولاَ اشكراختي الجااااازي كاتبة موضوع الخيانة ماقصرتي واشكراخوي اليامي على الرد....

نتكلم عن الخيانة واسبابهامن الطرفين ....

في مجتمعنايغفرلزوج على خطاة لكن الزوجة تعتبرمصيبة ولهم حق بس ليش الزوج والزوجة يقعون بالخطاء:
اسباااااااب الزوج......

مهماكانت قوة العلاقة بينهم وضمانهابأن زوجهالهاومستحيل يطالع غيرها ومع مرورالسنين يمل الزوج من الروتين اليومي حتى ان كان الزوج معروف بين الاهل والاقارب بالعقل بمعنى مستحيل يخربط
بس معة حق ان حاول يكسرالروتين بعلاقة بتقولون لا وليش ....
ليش ماتحاول الزوجة بين فترة وفترة تغيرالروتين حتى بأدق الاشياء لها معنا لوان الزوج من النوع الي مايعبرعن سرورة يكفي انتي بتحسين انة مستانس نقول بعض الاشياء مثلا:
غيري في غرفتك وماهوشرط اثاث جديد بتغثينة بالخسايروماراح يستانس ابد... غيري في مكان التسريحة اوالسريراوحتى تجيب قطعة سجادة حلوة ناعمة وحطيهابطرف الغرفة وعليهاكم وسادة طايحة بالوان مناسبة وماتتعدى قيمتها العشرة الريالات الوحدة وتشوف زوجهاكيف مزاجة اذامروق تلعب معة تجهزشي خفيف للاكل وعصيروتكشخ وتجلس على السجادة معة وتسولف وتحاول تضحكة اوتترجاة يلعبون ورق اوحتى لعبة بلاستيشن بس ماتنسى تنوم عيالهاوالااقسم باللة يكسراللعبة على راسهاويصايح بوجها(شايفتني بزر) ترى الاكثرية بيقولون وشدعوة نلعب جربيهاوشوفي حتى لوشفتيهاصعبة وتخافين يفشلك حاااولي بكم كلمة وانتي كاسرة عينك سوي نفسك مسكينة وزهقانة موطالعينة وعيونك مبحلقتهاوتغصبينة لاتنسين سوي نفسك كاانك تطلبينة يوافق تروحين السوق
ولاتنسين تشغيل الفواحة بريحة الفراولة والغرفة مرتبة والتسريحة ولاتنسين ان كنتي زوجة قديمة جداشيلي الفازلين والفيكس وزيت الشعرالي ريحتة توصل خلاياالمخيخ طلعي العطرالغالي الي خاشتة بدولاب من عيالش خلية برى بين فترة وفترة ترشين شوي منة وهويراقب تعدلين الشعريعني تحسسينة انش مهتمة بشكلش علشانة موالمسكين مايشوف الكشخة الاوقت الطلعة اولصارعندش عرس والمسكين بحلالة ولغيرة من الاحق فيها واللة هو....
واذاكان الزوج يحب الحناء وانتي لا حطيها لوفي السنة مرتين خلية يوديك عنداهلك مبكرواتفقي معهم يجيبون حناية وتحني وماخذة احتياطك بلبس كشخة معك ويكون وقت اجازة خلي عيالك عنداهلك بس لاتنسين خدامتهم معهم واللة يعينش على امش وخواتش بس اوعديهم بتمشية وامش قوليلها كم كلمة وخوفيها احتمال تطلقين وتسكنين عندهم تبين تراضين زوجش واللة تبخرك بلعودالزين لين باب البيت من الخوف بعدالتكشخ كلمي ابوالعيال واذاطلعتي وصايح وين عيالة ورية الحناء بيسكت ويقول فديتش العيال وينهم قولي بخليهم امي وخواتي يبونهم علشان مايعصب وبيستغرب طبعااذاكان عيالة من النوع الصعب الواحديتحملهم ....
اذاكان مروق اطلبية تتعشون اوتشربون شي برى من زمان ماطلعتوبروحكم وحطي في بالش يكون اخرالشهروقت الراتب وان ماحصل خلي معش فلوس اخرتهابيعوضك بااكثرمنهاولاتقولين بعداصرف علية مافيهاشي يمكن المسكين من مصاريفكم حتى البانزين نص الشهرياخذمن خوية كوني كريمة بكل شي بيكون لك اكرم الااذابعض الرجال ماينفع معهم الكرم الله يعينش بسندويشة من البوفية ....
المهم ماتنسى الزوجة تحاول حتى وان كان زوجهامايشجع تغيرفي شكلهاماهوالمسكين من اخذهانفس الخشة والشعرومااقول سوي عملية وغيري لا.. روحي مشغل قصي شعرش اصبغية حطي مكياج خفيف ناعم لاتروعينة وتغيرين شكلش مرة وحدة واللة ان يفشلش بعدالجلبيات والشعرالمربوط والكحلة الي نصهانازلة على خدودش تجينه غيرلا بتدريج مسكين ماتعودواصلابيكون التغيرالي مفاجئ مومثل التغييرالي يجي بتدريج بيكون احلابكثير....
غيري من لبسك البسي التنانيرالقصيرة لاتقولين عيالي وش ذنبة ومااقول القصيرة مرة تخلينة يشوف الركب الي ياسلام البسي الجنزومهماكان حجم الجسم والعمرالسوق ماقصرواهلة بس البسي الشي المناسب للعمروالجسم لايشوف البلاوي الي ساترتهاالجلابية فية لبس يخفي العيوب وحاولي اللة لايهينش تمسكين يمينش من كثرالاكل واهتمي بجسمش تجنبا للامراض يعني بصالحش...
اشغلية علشان مايفكربغيرش بس موتشغلينة يعني تكلمينة وتشتكين من عيالة ومضاربهم مع عيال الجيران اوتكثرين علية الديون علشان مايعرس واللة لوبغى الرجال العرس لوانة حافي منتف بيعرس
قصدي اشغلية بتفكيرفيش اتصلي علية وقولي كلام حلووش مشتهي ياكل على الغداء وتنتبة ليكون في اجتماع اومتهاوش مع المديرواللة ان يخلي غداش فوق راسش ان كان من النوع الي مزحوم في الشغل ارسلي رسالة فيهاكم كلمة تفتح النفس وسألية وش يبي على الغداء ان ماتصل وهويضحك ماكون راعية الناقة بيرجع من الدوام وهوحاس الطريق كنة طويل ويبي يوصل بسرعة....
مسكين يمكنة يرجع وتوالاخت تقوم من النوم والخدامة طابخة وعيالة فوق راسة يصايحون
حاولي اذارحتي السوق تذكرينة بعطرلوماهوماركة يكفي تذكرينة حتى لوكان من حلالة المسكين بس اذكرية موتشترين الهدايالغيرة بفلوسة وهوتبخلين علية ...
ان كنتي مسيرة ارسليلة مسج دايم عاملية كطفل امدحية دلعية لوعطيتية الورقة حقت المقاضي وماجاب الانصهاعاتبية بس بطريقة مدح ماقصرت فديتك اللة يخليك لنا بس الباقي فديتك نسيتها خلاص لاتجيبهاتعبناك ان ماجابهابكرة لك حتى لوماعندة فلوس لويترجى الهندي ياخذهاللغالية...
وان قالت وهي تصارخ وين الباقي انت ماتقصرمع اهلك واخوانك وانالاوتتهاوش وتسبب مشكلة ماتسوى ان يركب راسة مايجيبها ....
تراعي ظروف زوجهاموذابحتة في كل عرس فستان وروحة مشغل وفلانة زوجهايشتريلهاويعطيها
لاتقارنة بأحدحتى لوكان اخوة ترى موملزومة كل عرس ترزين خشتك بفستان جديداوتحضرينة ماعندك لاتروحين اواخذي من اختك اومن قريباتك علشان توفرين الزحمة على الدولاب والي تخسرينة بشي حق يوم تشترين لبس حق كشخة سنة ... ترى اناموضدكم معكم بس تجنبي شي تكونين انتي السبب
فية اذاخانش زوجش وحاول يدورالراحة والوناسة مع غيرك ,,,,
نرجع لزوج وادري طولت بالموضوع بس مثل مابينت اسباب الزوج نقول اسباب الزوجة الي رداليامي على موضوع الجازي.....

ليش يالحبيب اسلوبك برى البيت قشطة وعسل ومع زوجتك بصل من تدخل البيت شاب نارومعصب وحاط حرة الي برى على زوجتك المسكينة ...
يكفي انهامتحملة عيالك ويمكن تكون امك في البيت ومشبعتهابكم نغزة وكلمة حركات العجايز...
تشوفك مع امك عسل وهي لا تخليهاتكرة امك وماتنلام بصراحة الرجل القمة بسلوبة يخلي زوجتة تحترم امة وتخاف عليهااكثرمنة ومن حتى بناتهابطريقتة ومعاملتة ...
ساوهابالمعاملة ام عيالك وش خسران عطيت امك عطهاتخيل انك متزوج ثنتين تجنب الغيرة بينهم الام تغاروبقوة على ولدهاوالزوجة نفس الشي حتى من عيالها..
تجنب وجع الراس والمشاكل ترى بيدك سعادتك وتعاستك واكثرالمشاكل بين الزوجين اسبابهاالاهل ان كان لك اخوات في البيت لاتنساهم طلعهم معك بعدماتطلب الموافقة من زوجتك حتى لوكنت بطلعهم غصب عنهارضت اومارضت طلعهم وهي موافقة وتضحك علشان ماتخرب الطلعة وترجعكم بسرعة
قلهامساكين وش رايش نطلعهم يتمشون وعلشان يمسكون عيالنابعدوانتي بطلعش مرة ثانية محدمعناصدقني اذاماودك تطلع مرة ثانية وتوهقت بتقول لاخلاص ماقصرت....
اكشخ لزوجتك وتعطرورتب شكلك مثل ماتبي منهاالمسكينة تبي زوجهايكشخ لها
اضحك لاتكشروتخليهاتتمنى احديكلمك علشان تشوف ضحكتك اوالضحك مع الزوجة حرام خل الرسول صلى اللة علية وسلم قدوة نبي مرسل وكان حسن المعاملة مع زوجاتة اوانت شايف نفسك غير...
( رجل اعمال )مالك والضحك معهاتخرب شخصيتك لاتنسى سعادتك بيدك تبي البيت يكون جنة صغيرة تقدربااسلوبك وان كنت مستغني ابشربطين عيشتك وكل يومين عنداهلها زعلانة وترجع للعزوبية وتمل اكل المطاعم ورزة خشتك بيت اهلك وقت الوجبة ويمكن بيحرجونك وين زوجتك وماودك تقول لانك غلطان عليهااوتتعذربزيارة مفاجئة لواحدمن ربعك وتضطرتطول عندة علشان تصادف الوجبة وانت مسكين حظك شين خويك ماياكل العشاء الثقيل يبي ينام خفيف وانت متعودعلى الكبسات والاكل الزين وش حادك على قطة الوجة احدقالك تزعل ام العيال
اشترهدية مرة في السنة ماقلنافي الشهربس اللة اللة بلهدية السنعة اذاكانت في السنة تكون غالية اواذابين فترة وفترة عادي رخيصة يكفيك بتشوف الفرحة في عيونهاوالضحكة الي تشق الخشة ومعاملتهالك تتغيرحتى الهدية لهاتأثيرعلى نفسيةالزوجة تسمعهااسبوع تسولف مع اهلهاوصديقاتهاعن هديتك تستخسرعليهاالسعادة بثمن مايستاهل وانت المستفيدبتشوف الراحة وتخاف عيالها يزعجونك وان كنت بخيل ابشرباازعاجهم وقت نومتك في القايلة يمكن تلعب معهم كورة بلحوش بس علشان تزعجك ....
عاملهاباحترام قدام الكل بينك وبينهالوتكسرراسهابس ماتقلل من احترامهاعنداحدحتى لوعيالهاترى تحمل الكلام الي بتقولة تستاهل تبي تحترمك احترمهالاتنسى شريكت حياتك وسعادتك صدقني بتحترمك وتراعيك حتى لوزليت مرة واخطيت تستاهل تسامحك ....
اذاحبت تعزم صديقتهالاتعصب وتزعل وماتجيب لهالوازم العزيمة وتحرجهاقدامهم لاتقصرجب الي تبي وحتى لوماطلبت شي جاهزاشترصينية حلا اوكيكة جاهزة ترى كلة لمصلحتك يمكن بعديومين يتصلون ربعك ويبون يتعشون عندك اوكنت معزوم وبتعزم الي عازمك وش رايك تبي سفرة تبيض الوجة اوسفرة اي كلام ادري كل شي تقدرتجيبة من برى والخدامة بتسوي الباقي بس فية فرق اذاكانت زوجتك مشرفة على كل شي حتى ادق التفاصيل تخيل توهقك الخدامة بفناجيل القهوة ماهي نظيفة اوكل فنجال شكل خلك حبوب مع زوجتك ولاتقصروابشربطلع طقم البيالات والفناجيل الي شاريتهالعزايم صديقاتها
والسفرة الي قبل العشاء وبعدالعشاء....
لاتمدح احدقدامهاحتى لوكنت صادق شوفي زوجت فلان ماقصرت بلعشاء الزين اوتقول شوفي فلانة يقولون حظ زوجهافيهالا والف لا لاتقارن حتى لوكانت اختهاترى تحقدعليك وتخليهاتشوف عيوبك وتفتح عيونهاعلى معاملت فلان لزوجتة وهي مسكينة اللة بلاهابزوج مثلك
لاتسب اهلها حتى اهلك ماينسبون حبهم لوحتى ماتحبهم لاتبين اكرمهم اذازاروكم خلهاتفرح وتقدرك
علشان اذاماسيرت اختك اواخوك ماتكرهم في طبت بيتك مرة ثانية ... حتى لوكنت حريص بتنغص على اختك اوزوجت اخوك انت برى اوفي المجلس واللة ماتدري عن شي وان كنت معامل اهلهابطيب بتعاملك اهلك بكل احترام حتى لوكنت غايب عن البيت مرتاح ان زوجتك بتقوم بالواجب

*******************

الزبدة اذاالزوج مايبي زوجتة تخونة عاملهاكاالحبيبة كاالعشيقة ارسل مسج لجوالها حط هدية في دولابهالماتفتحة تلقاهايعني زوجتك اولاباهتمامك علشان تكون سعيد
والزوجة علشان زوجهامايخونهاعاملية كالحبيب اعشقية على طول خلي اهتمامك لة واهتمامك لنفسك علشان حبيبك زوجك ولاتنسين الرجل مهماكبرفي السن يحب ان يعامل كالطفل بالاهتمام والمراعاة تجنب للخيانة من الطرفين والمصارحة بينهم وكل واحديشتكي لثاني عن همومة علشان محد يدورلطرف خارجي يسمع الشكوى شاركي زوجك همومة وانت شاركهاهمومها وافرح لفرحهاواحزن لحزنها واذاتضايقت منهابشي تكلم صارحهامن غيرماتحرجهابااسلوب مهذب خلهاتقول لك عن عيوبك ولاتزعل ان كان الزوج كامل والزوجة كاملة مااتوقع فية خيانة واتمنى مااحديزعل والموضوع فية نوع من الصراحة وماتشجعت الابعدماقريت الموضوعين السابقين وسلامتكم وبالتوفيق

[اطياف الماضي]

الله يعطيكم العافية

عزيزتي راعية الناقة

ماقصرتي ونصائح رائعة وان شاء الله الجميع يستفيد

تقديري