العمر محدود ولاّ الوقـت لـه دوره=وانا الى الحين واحزاني هي احزاني
والوقت لو جار ماهتميت من جـوره=بدري على الوقت يامرني وينهانـي
شفني هنا والنجـوم هنـاك منثـوره=ان كان ماطلتهـا مانيـب عرجانـي
شاعر واحب الشعر واغوص فبحوره=كـن القصايـد تعزوابـي وتنخانـي
والشاعر اللي لا غنّى يقفـد شعـوره=يستاهل انك تجـي لمشاهـده عانـي
والجادل اللي معي بالصوت والصوره=تاقف على بـاب فكـري ماتعدانـي
كنهـا تـردد بعـون الله منصـوره=وكنها تغذا علـى دمـي وشريانـي
احيان فيها عقـل واحيـان مطيـوره=واحيان تخطي علي وتقـول بلعانـي
تضحك على لهجتي لاقلت ماجـوره=والحين صـارت بلهجتنـا تحدانـي
ماهي على الوصل ملزومه ومجبوره=تقرب وتبعـد وتذكرنـي وتنسانـي
تقول كان الغلا في جـوف سبـوره=قم اكتب اسمي غلا ولاّ قم امحانـي
لبّـى الغـلا يابرنسيسـه ياسنيـوره=امن الغلا ماذكرت اسمك على الساني
اخاف مـن واحـدٍ لادق لـي زوره=قدام عيني والى من رحـت يقفانـي
يامطلعة شاعر الابداع عـن طـوره=الى متـى والخطـا منـك يتمثنانـي
تخطين واسامحك واقـول معـذوره=اروح فيها لمن قلتـي علـى شانـي
القلب بستان وانتي اجمـل زهـوره=مايقطفك من خفوقـي واحـدٍ ثانـي
تربّعي دام لـك فالقلـب مقصـوره=والله ماانسى غـلاك ان الله احيانـي
سالم بن جخير