يوم السبت الموافق 20 - 1- 2007
اقام الشيخ ناصر بن صالح العرق ... وليمة غداء بالقرب من النعيريه على شرف الشيخ راكان بن خالد ال حثلين والشيخ فيصل بن محمد ال شريم
وكلفت من قبل الشيخ ناصر بن صالح العرق بكتابة قصيده ...
اتمنى ان تكون ... وتنال استحسان الجميع
سلام تسليمة وفاء ترقى على حد الغمام =من شاعر ٍهاضت قرايح فكره وجاته اشمام
يا مرحبا ترحيبة ٍباسمي وباحروف القصيد= ويا مرحبا واهلين عند اللي لهم قدر ومقام
ويامرحبا ترحيبة ٍ ,تكسى بعود وزعفران= ويامرحبا ياروسنا يامرحبا ياشيوخ يــــام
اللي لهم ذكر .. جميل ..اللي لهم فعل جليل= واللي يفكون النشب واللي يحـلون الخصام
راكان بن حثلين كساب العلوم الكايدات=له صفحة بالمجد وافعوله بها تذكر اجسام
شيخ ٍ رقى بالمرجله والفعل روس النايفات =ويفرح به اللى من ورى القضبان محكوم عوام
به حنكه .. وحكمه لاجـــات المعضله ماهي تكود=ويزهــاه بشت يلبسه نسل الشيوخ ابن الكرام
الله يديمك ياولد خالد لنا درع حصين= لأنك الى من ضاقت القاله بيمنـــانا حسام
ويا فيصل ابن شريم .. راعي الطايله سقم الحريـــب= ابو محمد شاهر ٍ بالطيب في ذروة سنام
زيزومنا.. هداج تيما ناقل الحمل الثقيل=يذري.. ذراه .. الى وزاه اللي عيونه ما تنام
شيخ الى منه لفانا ذكـــره ..ينومس نبـــاه =وجاهه وماله يعتق ارقاب بعد ماهي تسام
الله يمد سنين عمرك يا حـــزام ما يـــبور=لانك الى من كبرت الدعوى رفيقك ما يظام
يا شيوخنا والحرف في طاريكم ايشوق البشير=والمدح يزهى من زهـــاه ويثبت الفعل الكلام
انتوا .. الرجى ..وانتوا .. ألامل .. وانتوا هل الرأي السديد=وانتوا .. لنا متون ٍ تذرينا .. بصكات الزحام
يحجي حجاكم ... من هموم الوقت الاقشر والظروف=لاثقلت وكادت .. ورى خشوم ٍ مشى فيها العرام
يا شيوخنا وانتوا عيون ٍ تعرف بجمهــــاة يــام=والعز يبقى.. رسمه .. وذكرة.. ولله الدوام
والشعر يفخر لا كتبته فيكم ويرقى سنود=ويشرف الشاعر قصيدة تجمع ثنين عضـــام
يامرحبا باسم العروق وباسمي وباسم القصيد=ويامرحبا عند الشيوخ اللي لهم قدر ومقام
وسلامتكم