آه مـن هـم(ن) علـى قلبـي سـرا
لا خمد هم(ن) لفـا هـم(ن) يبـاري
المصايـب حطمـت قلبـي اجـهـرا
وللمشاكل فاتح(ن) احسـاب جـاري
يرحـم الله مـن علـى بالـي طـرا
مانسيته دايـم(ن) حاضـر وطـاري
البـطـان اوسـيـع ماعـمـره زرا
ولايبيـن بالـزعـل لـوكـان زاري
رحمـة الله تنـزل بـذيـك الـمـرا
يرحـم الله مـن توفـت بالعصـاري
مـن خذوهـا والعيـون اللـي تـرا
انفجـرت مـن البـكـي والله داري
ومن توفـت ماعرفـت اللـي جـرا
وقفـت ساعـات عمـري ياعـذاري
ماذكـرت الا العـزا فـي المقـبـرا
ولا نسيت لحظات دفنـه والتـواري
الجـروح جـداد والحـيـل افـتـرا
والهمـوم اتلوفنـي لـوف الـذواري
مـاأذوق الـزاد وعيونـي اسـهـرا
كنها بترجع علـى طـول انتظـاري
والبشـر فـي نومهـا مـحـدن درا
وان دروا محدن على الفزعات ضاري
اتصـدد مـن مـشـاري لا يــرا
لا يشوف الموت في عيون انكساري
لا لمحنـي هـل مــع(ن) احـمـرا
ثم نصانـي رافـع ايدينـه يمـاري
ابـي امـي جيـب امـي او تــرا
بشعل الدنيـا حريـق وفيـك نـاري
كلمتيـن(ن) قالهـا فــز وجــرا
مايهمـه غيـر لعـبـه بالـقـواري
قامـت الدنيـا تضـيـق وتصـغـرا
والهموم بـزود وللضيقـه مـواري
ليت لـي قلب(ن)مثـل غيـري بـرا
وللسعاده سوق بين بايـع وشـاري
القـدر مكـتـوب والعـيـن بـتـرا
ومانكتب باللوح لك صايـر وجـاري
والسحـاب اللـي ترجـد وازبــرا
جعل هتانـه علـى قبـرش عـذاري
وتنقلب هالأرض عشب(ن) اخضـرا
عقب ماهي جـرد ربـع بالصحـاري
وصح الساااانك قصيده مؤثره ,,
والله يرحمها ويغفرلها ويسكنها الجنّه ..
والله يكون في عونكم و يصبركم ,
هاذي حال الدنيا ,, والبخيت اللي يصبر علا جور بلواه,,
يشهد الله يابومشاري ان اللي عليك علينا وللي يحزنك يحزنا ,,
ولا آقول الا الله يعنا ويعينكم بصبر,