.
[ طاريـك ..
لبيه يا صوتك و شوفك و طرياك
و لبيه يا ليلٍ سرى في حراويك
لبيه .. يا لذّة وصالك و لاماك
إلّا على طاري وصالك , وطاريك ؟
هو عاد تذكرني أو البعد نسّاك
هو عادني غالي أو أرخصت غاليك ؟
يا ملهمي ما عادني صاحبك ذاك
انا تعبت اشيل جرحي و أناديك !
أقفيت .. وظروف الزمان اتحدّاك
أبطيت .. ومدري وين دارك و أراضيك
وانا لك الله كل ماعيد ذكراك
أحس كني معك و آعيش ماضيك !
شفتك هنا و هناك و هناك و هناك
من وين ما لدّيت عيني .. ألاقيك !
في ضيقتك في فرحتك في هداياك
في ضحتك عقب الزعل يوم اراضيك !
في طلّة حجاجك وفي بسمت شفاك
في دافي حساسك إلى راحة يديك !
يا ملهمي وش خانت العمر لولاك
وش خانت عيونٍ ماهي تلتفت فيك ؟
تعال واكحلها بشوفت محيّاك
و شفها وهي عن كل ماصار تنبيك !
تفداك هي .. وكل ما صار يفداك
تعال , وكل ضلوع صدري تحيّيك !
بـ أقبل عليك من التعب و آتلقّاك
إقبالت إلي من جفا الناس ناصيك !
ويلي على شوفك وضمّت حناياك
و أشيلك بصدري واحفظك و أداريك !
تعبت و آنا بين هجرك و رجواك
لا طايل ٍ وصلك ولاني بـ ناسيك !
أحن لك , و أشتاق لك , و آتحراك
حتى لو أكابر .. ليا مر طاريك !
ولا تغرّك الضحكه مع ذا و ذولاك
أضحك مع غيرك , وانا خاطري فيك !
أحمد بن جوفان
.
__________________
.
{ عسى الله يفك عوق أبو حمدان }
لولا الأمل .. مات الفقير .!
.