[عبرة وداع]

ياسعود يامشكاي ويش التدابيـر
لاتشتكي جور السنين وشطفهـا

**
جور السنين يحل ويمر ويصيـر
راجع زمانك واكثر الناس شفهـا

**
الناس لاحقها من الوقت تاثييـر
وتصبر على باس السنين وصلفها

**
تميل ميـلات المقاديـر وتغيـر
وان وصفت بتعذب اللي وصفهـا

**
فحرص على قرب الرجال المناعير
اللـي دروب المرجلـه تحترفهـا

**
تلقـى بخوتهـم معـزه وتقديـر
ومجالسٍ مادنست مـن عرفهـا

**
تاقف معك لو همك اكبر من النير
وبعزمها حتى الصعاب اتعسفهـا

**
ولا قدر الله ثم رمتـك المقاديـر
الرجل منهـم وقفتـه لا وقفهـا

**
تسوا لها فزعة صفوف وطوابيـر
ماهوب لا شاف الصمايل حرفهـا

**
يقلط على الشده كما سالم الزيـر
وتامن به الديره وهو في طرفهـا

**
لامازهمته قام يشتح كمـا الطيـر
لاضف جنحانـه وكفـه عكفهـا

**
واهل الردى مالك وراها مداويـر
جنب مجالسهـا وجنـب ولفهـا

**
لو اضحكتلك في السنين المياسير
لابد في وقـت القسـا تكتشفهـا

**
تفِرح بك الشمات لو ذنبك اصغير
وتحتار في اصغر غلطةٍ تقترفهـا

**
ويصير همك كبر هضبة شمنصير
لكـن جنـب معرفتهـا وعفهـا

**
لانذال رفقتها مهونـه وتقصيـر
وتِكثر عنا نفسك وتكِثر حسفهـا

**
فالرفقه اللي ماتدلك علـى خيـر
آللّّـه يلعنهـا ويلعـن جدفـهـا

**
ولا تـراجع جاهليـن المحاضيـر
ولو تعترض لك كلمة اللاش طفها

**
واحفظ السانك لو بلوك المعاثيـر
الكلمه اللي دون ميـزان خفهـا

**
يجوز ترمـي كلمـة دون تفكيـر
والصبح سودان القلوب اتخطفهـا

**
واصدر لياما عفت صدارت ابعيـر
لاترتجيها واطلب الله خلفهـا

**
وترا النصيب يصيب مافيه تغيير
لو تجبد امواج البحـر وتغرفهـا

**
وعذر الرجال الوافيه خله ايصيـر
ابيـك تعذرهـا وتقبـل أسفهـا
**
العذر يقبل لاحصـل فيـه تبريـر
امن الرجال اللي صريـحٍ هدفهـا

**
وفي كل شي قد تجـوز المعاذيـر
الا على اعراض الرجال وشرفهـا

**
اقولها وانا الذي سلوتـي غيـر
البعد عن ضيق البيـوت وكنفهـا

**
واسج في خبتن كستـه النواويـر
حيثه هواى روحي وحيثه نصفهـا

**
واسواق الاسهم والذهب والدنانير
لو سلموها في يـديّ اصطرفهـا

**
ينوبها ملحاٍ من ابـل المناصيـر
ارعابها زهر الفيـاض وقطفهـا

**