هو أنا اللي غريب أو هم الاغراب؟
منهو اللي من دياره مسافر؟
أحيان ما ودّك تفكر بالأسباب .,
أنا بليا سبيل وصرت عابر .!
جلبت حلمين وواحد منّهم خاب .,
وبعتهم كلهم على الدفاتر .!
لو الدفاتر متاجر رزقهم طاب .,
أحلامنا رزقكم يا اهل المتاجر .!
أقول حزني نسيته عند الأعراب .,
والقى الحزن في بلاد الغرب حاضر .!
قلت الحزن ما يجي والجو خلاب .,
ولقيته يزيد خص ب يوم ماطر .!
وإن دفت الشمس عقب البرد الاعشاب .,
القاه يرجع مثل ماني ب خابر .!
يا حزن منت ب عصب وأشيل الأعصاب .,
ولا ديانه عشان اصير كافر .!
ما شاب شعري / ولكن ناظري شاب .,
مخابري هم ., والضحكه مظاهر .!
قلبي يحط الأمل ب عيونه أهداب .,
وبقى على طول ., متأمل وساهر .!
وبيني وبينه ., شجار وهجر ., وعتاب .,
مابي يكابر ., وأنا مقدر أكابر .!
اجمّع الضحك قبل أطلع للأجناب .,
وإذا خلص ., أتسلف ضحك باكر .!
ليت السماء يوم تمطر / تمطر أحباب .,
وأتصبّر الصدر من موتى المقابر .!
لو المهاجر لقى الراحه بالأقراب .,
ما كان مجبور من داره يهاجر .!
أمّا فرح مثل فرحة طفل بألعاب .,
ولا ترا بأخذ الدنيا واسافر .!