[سعد الصميل]

فيه مواقع سوت ثورة في عالم الانترنت . . ومن اهمها طبعا . . قوقل - يوتيوب - تويتر - فيس بوك . .

انا حاليا بتكلم عن التويتر . .

بما اني لي وقت في التويتر . . وادخله بشكل يومي على فترات متقطعه . . لكني مقل في التغريدات . . واكتفي بالمتابعه لا اكثر . .

المهم . . ماعلينا . . .

اكتشفت ان التويتر مثل حياة الانسان . .


تسوي لك حساب تنولد في عالم التويتر . . تبدأ فيه مثل الطفل ماتعرف شي . . حبه حبه لين تصير محترف !!

تبدأ تعرف الناس والمغردين في التويتر . . تسوي follow للي يعجبك . . مثل البزر اي واحد يعجبه يتبعه !!

تكبر شوي بعدين تغرد . . ويعرفونك الناس . . ويسوون لك follow !!

كثر ماكان نجاحك في التغريد . . كان صوتك مسموع اكثر وعلى نطاق اكبر . . ويزيد عدد الـ follow !!

لكن ؟

من توقف عن التغريد الى الابد . . راح يقل الـ follow وينسونك الناس شوي شوي . . ويصير العكس ويكثر الـ UNFOLLOW . . وحبه حبه لين تختفي من ذاكرة الجميع تقريبا !! إلا من رحم الله !


بإختصار . . التويتر مثل الانسان في واقعه . .

ينولد . . يكبر . . ينعرف . . وبعد موته ينساه البعيدين . . وشوي شوي . . لين ينساه الكل . .

إلا من رحم الله !!


عسى الله يرحمنا برحمته . . ونبي الـ follow في الواقع على خير , مهوب على ردى