لاتنـادينــي وكــــل شـي انتهــى مـن دون سبـه
سٌمــــح الله الــدروب وعـــوض الله العــلاقـه
رح فمـــان الله واذكــرني بخيـر وشــوف غبه
في بحر عمر ٍ طريقه غامض ويوحش مساقه
لاترجـــاني خـــلاص ودمــــع عينــــك لاتكبـه
لاتـــرجى رجعتــي وتقــول لــوحتــى صداقـه
مستحيــــل إنا نكـون لبعـض أو نرجـع أحبه
من يفــرط في رواقــي مااتمسٌــك في رواقـه
وش يفيـــد الدمع قلـي لواحد ٍ ماخاف ربه
الدمـوع الصـادقه بالقلـب ماهـي بالطفاقــه
مخطي ٍ من هو يحسب ان الغلا رجم ٍ يذبه
و القلوب البيض طيبتها مع العالم حماقه
كانت ايام الهوى شوق وسعـــاده مستتبه
كنت احبك واتعذب واشفق لشوفك شفاقه
كنت هايم وانت لٌوك زدت بالتعذيب حبه
كان شفت القلب ماله في طعون البعد طاقه
بس راحت مع نسيم ٍ كان يغريني مهبه
وانجلى طعم الفرح واليوم ماتقت لمذاقه
ان لقيت إنسان مثلي مايخون الود حبه
وقتها بتعرف قيمة من تهاونت بفراقه
كل جرح ٍ من فراقك لانويت اجيب طبه
بذكر أنك كنت غالي وكنت للقلب اشتياقه
اخذ مني قاعــده صارت بفكر العقل قبه
واخذها مني قناعه في مفاهيم العلاقه
ممكن بيوم الصداقه تكبر وتصبح محبه
بس لا يمكن بيوم ((الحب يتحول صداقه ))