تبي تعرف عقب مارحت كيف الحال
تعال اسمع لسان الحال واحساسه
اغني لك حزن يبكي صدى الموال
أسولف للفرح تزفرني أنفاسه
أجامل والهموم الموجعه تجتال
كثير اللي غرس في مهجتي فاسه
تعبت ولا لقيت لضيقتي مدهال
أبت غير القصيد وصدر قرطاسه
وطن كل الأماني والعمر رحّال
يدوّر حلّمه اللي غاب نبراسه
حبيبي لا تشمّت فيني العذال
أنا قلبي بدونك ملّ من ناسه
أحبك إيه أحبك والغلا لازال
مدام الشوق فيني ماضعف باسه
أحبك كثر ما دمع المحاجر سال
على خد اليتيم وبلّل ايباسه
كثر ما شاعرك بكّى عيون أبطال
كثر ما شاب من ليل السهر راسه
كثر ما ذاب طيفك يارفيق البال
على جمر الهجر من يوم ما داسه
مثل ما للحكي آخر لو إنه طال
ترى للصمت ناس ٍ توزن اقياسه
تبي تعرف عقب مارحت كيف الحال ؟
شربت امن الصبر لكن فضى كاسه