ياحرف جرّ القلب ماغيرك احروف
هــــزت فؤادٍ يقتــله حــر لاماك
طبع الزمن غدّار وكلٍ له اظروف
وانا على عهد الوفا دوم منساك
انت الغلا واغلى من العين والشوف
وانت الدهر والغيث طلة محيــاك
وانته امان الخوف لاجيت مرجوف
وانته ملاذ الروح والقلب ينــخاك
وانته عذاب الحال وذا شي معروف
كلن عرف عن حالتي من سواياك
اسأل وتلقا القلب تايه وملهوف
وعايش عسى في لحظه بيوم يلقاك
من بعدكم والحال تايه ومخطوف
خصاً اذا جاء الليل ساري بذكراك
اسري مع الهاجوس والف واطــوف
كل الديار اللي بها كنت واياك
واصبــح على حال بها الهـم مغلوف
حالٍ كساها الحزن من يوم فرقاك
يافرحة المشتاق مع فزعة الخوف
طال الزمن والوقت غربه بلياك
لملم شتاتي وازرع الورد بالجوف
واروي العروق الظاميه من شفاياك
ازرع امل واشعل دفا واحضن كفوف
رد الامــل في قـلب قد كان ملجاك