ياصاحبـي ماهقوتـي إنـك تخلينـي كــذا
البال متكدر ونفسي صـدق ماهـي رايقـه..
مابه خوي حولي ماغيـر اهـل الأذيـه والأذا
وآنا ورب البيت حتى الثوب مانـي طايقـه...
أجامل الدنيا وانـا همـي معـي مثـل الغـذا
في لقمتي.. في مشربي.. حتى هواي يظايقه..
مليت من تدبيـر ذا وتٌعبـت مـن تلفيـق ذا
وتُعبت وآنا والزمن مـن كذبـه لُحقايقـه...
وتٌعبت من كيف..ومتى..وشلون..ويمكنّـه إذا
وتٌعبت من ذنب ٍ يعذبنـي واجـي طرايقـه..
وتٌعبت من فرقا الحبيب اللي خـذا واستحـوذا
وتعبت من دمع ٍ يسرينـي وأعـود رايقـه..
وتٌعبت مـن حنـا وماحنـا وذا (فيضـي) وذا
وتُعبت من ناس ٍ تماشيني وانا أدري بايقـه..
وتٌعبت من شوف الشيوخ اللي يخرزون (الحذا)
وتُعبت من حلم ٍ يجي فـي آخـره عوايقـه..
وتٌعبت وآنا كـل مـا أبـذل جهـد واستنفـذا
نتايجه..عـد الشهـور وعقبهـا دقايقـه ...
وتٌعبـت وآنـا كـل ماغنيـت قالولـي لٌـذا
وتٌعبت .. إيه تٌعبت من جوف ٍ كتم حرايقـه..
ياصاحبي والنفس تبدي طيبهـا علـى القـذا
لكنّ محجـر عينـي يعيـي علـى موايقـه..
يالله ياللي حكمتـه يعطـي وإذا أعطـى خـذا
تغفر لـي ذنوبـي يـارب ٍ يغفـر لخلايقـه..