[شاعر المنتدى]

السلام عليكم

أول مشاركه لي في منتداكم الموقر

يا سيّدة غيد البدو يفداش من هم زعلوش= عليّ..وآنا ما اذكر إني جبت شيِّ زعلش

يسألش من هو ماتغير عنش يومن غيّروش= لا تنكرينه بعد سلم لش خفوقه وابتلش

شاقه لقاش وقلبه لوصلش بعد بعدش يطوش =يشتاق في وقت الوصل وشلون ما يشتاق إلش؟..

في البعد. وعيونه ليا من نسنس الغربي بكوش = وشعبان لو يسبق رجب هيهات لا ما همّلش

لو يطوي الماضي عبث اهجوس فكره ما طووش = مستقبله عنده يقين إنه معا مستقبلش

وشلون يطوي ضحكة الاطفال والوجه البشوش= وعيونش النعّس وغرّة وجهش الله يقبلش

وشلون يطوي ريحة الجوري وخنّات الرشوش = بانفاسش العذبه والى منه برد يستشعلش

يذكر بليله فارهه ليلة خميسِ زينوش = (والطيرُ قد غرّدَ لش ..والطبلُ قد طبْ طَبَ لش) !!

والورد قد فتّحَ لش.. واحلى الجواري لبسوش = واللي تمنى نظرتش واللي تمنى قبّلش!!

واحلى العذارى ودهن لو هن من الزين اسلبوش =مامنهن إلا في المكان المتسع تســـتــــثــــقلش

تاج الجمال- الله عليهن - كانهن ما توجوش = تستاهلين التاج يا الفدعا وهو يستاهلش

زينش طبيعي دون مكياج وبلا روج ورتوش = سبحانه اللي زيّنش سبحانه اللي كمّلش

وريقش كما سكر نبات أصلي ولا هو بمغشوش = يا كبر حظ اللي عطش ثمن شرب من معسلش

ويا بخت من حولش ليا غيّم سماهم ناظروش = إلا بعد يا بخت جيرانش ويا مبخت هلش

يا سيدة غيد البدو لا والله إلا زعلوش = عليّ.. وآنا ما اذكر إني جبت شيٍّ يزعلش

وسلامتكم

شاعر المنتدى


.