يابن مطرود والله لو أصوت وانـادي
وين انا وين عربان/ن شمال المصلي
حايل البحر كلـه دونهـم والحمـادي
والامـارات والدمـام واكبـر غـلّـي
طالت أيامي في مسقط وطول قعـادي
أشهرين قضت والثالـث اليـوم هلّـي
حدر سود الجبال اللي ِتروع الفـؤادي
أبرك أيامنا يوم انقضت حاجة/ن لـي
أتصبـر وزادت حرقتـي وأجتـلادي
مشتقـي بالنهـار ومرقـدي مستملـي
لاتذكرنـي الفيحـاء وشوفـة أولادي
لو أبي شوفهم يابـو خلـف ماحصلـي
وين انا والحبيب اللي بذاك البـلادي
شرقي صليبيخات وقبلة/ن مـن حولي
والله اني مشيت مع الحضر والبوادي
كل نسوانهم مافيهـم أوصـاف خلـي
بنت شيخ/ن ومن ربع/ن تصد المعادي
يكرمون الضيـوف ويلحقـون المتلـي
بيّنات/ن مواقفهـم نهـار الطـرادي
مابهم من يكـن ومابهـم مـن يذلّـي
الشاعرالكبير / سليمان بن صالح الهويــدي .. رحمه اللـــه