يا من تركت القلب مبلـي وفرحـان
فرحان لجلك مبتلـي مـن ضنونـك
الجوع خلا الذيب يطمـع بالأنسـان
ولا انت ذيبـن طايحاتـن سنونـك
ابيك تفهـم مقصـدي دون نقصـان
وانا ادري انك ضايعن من عيونـك
واعرف ترى يا اخوك هالوقت خوان
واعرف ترى من خان لجلك يخونك
حابس حياتك وسط بيتـك بجـدران
مالـك رفيقـن بالرفاقـه يصونـك
اما يجي لك تالـي الوقـت انسـان
يتعب على شوفك يـداري شؤونـك
يضيق لا شافـك مكتـم وزعـلان
ويفرح اذا شاف الفرح في عيونـك
والناس تنسى تالـي الوقـت خـلان
ودامك نسيـت النـاس مايذكرونـك
وترى البشر تحسن اذا شافت احسان
وبحساب صدماتك ترى يصدمونـك
وازن حياتك طالبك وسـط ميـزان
ولا تتـرك الدنيـا تكمـل بدونـك
ودامك مهمل حق صاحب وجيـران
اعرف تـرى بأمكانهـم يهملونـك
ماتدري ان الناس اشكـال والـوان
ولابـد تفهمهـم لجـل يفهمـونـك
قافل على نفسـك بغرفـه وحيطـان
ماتعرف اعدائك مـن الـي يبونـك
دامك تجازي كل هالنـاس حقـران
شلـون تبغاهـم بعرسـك يجونـك
مدام ذكرك حي بالطيب يـا فـلان
تغانـم الفرصـه قبـل يحقـرونـك
ومادمت في زهرة شبابك وفرحـان
الحق على نفسـك قبـل يقطفونـك
ومهما تعيش ازمان و ازمان وازمان
لابـد مـن يومـن يبـي يدفنونـك
بادل كلام الناس في طيب واحسـان
مادمت شاريهـم تـرى يشترونـك
هذي نصيحه صغتها وسـط قيفـان
لأثبات شيـن شايفـه فـي عيونـك
لاتنكر الواقـع ولا تقـول غلطـان
ولاتنكـر العالـم و هـم يسمعونـك
انصحك تسمع مقصدي دون نقصان
وتسمع لناسـن قصدهـم ينفعونـك
واترك كلام الناس عنـك ولـو زان
وانتـه علـى كيفـك اذا يعجبونـك
ماجيت ادور من ورى النصح اثمان
القصد عدلك مـن قبـل يتركونـك
وختامها ياذيـب بالطيـب برهـان
اني ومـا فينـي تـرى يعشقونـك